En conexion cu e noticia di INTERPOL tocante e accionnan den region di Caribe cu a tuma luga den e periode di 3 te cu 6 April 2018, Taskforce contra Traficacion y Contrabanda di Hende di Aruba ta confirma cu nan a participa den e accionnan menciona bou di capa di e proyecto internacional “LIBERTAD” di Interpol.
E accion aki tabata pa encontra y rescata posibel victimanan di traficacion y contrabanda di hende den region di Caribe y Latino America. For di September 2016 e Taskforce bao guia di e Coordinadora Nacional, sra. Jeannette Richardson-Baars, hunto cu sr. Max Wernet di e Centro di Coordinacion, a coopera cu Interpol door di duna training na otro paisnan den Caribe y Latino America y asisti na e preparashonan pa e accionan bao di guia general di INTERPOL. For di fin di aña 2017 e preparacion pa e accionnan na Aruba a cuminsa hunto cu Ministerio Publico, KPA, Coastguard Aruba, Interpol Aruba y Directie Arbeid en Onderzoek.
E accionan a tuma luga di 3 te 6 di April 2018 y restaurant, joyeria, area di construccion, hotel y companianan di watersport a wordo controla. Tambe tabata tin un 100% checkeo na lama pa yegada di boto cu personanan ilegal na nos costanan. Durante e accionnan a haya un total di 22 persona den un situacion unda nan tabata hopi dependiente di nan doño di trabou. Algun di di nan a resulta den explotacion laboral na unda posibel crimen penal a wordo cometi. E casonan aki ta bao investigacion di Cuerpo Policial y Ministerio Publico. Otro casonan lo conduci na boet pa e doñonan di trabou cu tabata tin personanan ilegal trahando pa nan. E personanan ilegal a bay bek nan pais.
E cooperacion entre tur e 10 departamentonan concerni (KPA, DAO, DIMAS, Interpol, Coast Guard, Koninklijke Marine, Koninklijke Marechaussee, Directie Volksgezondheid, Slachtofferhulp y Departamento di Impuesto) tabata un exito rotundo. A wordo dicidi pa mas frecuente accionnan asina riba tereno di traficacion y contrabanda di hende lo bay tuma luga na Aruba.
