Mientras cu mainta a detene director di Recursonan Humano di Aruba Airport Authority, un rato despues ya el a recobra su libertad. Ministerio Publico a subraya cu esaki no ta ningun eror di husticia, sino cu no a mira motibo di mantene e sospechoso cera.
“E sospecho contra señora ta complicidad na ladronicia y estafa. El a wordo deteni na e manera cu el a wordo deteni dor cu e tabata, segun rutina, red flagged na frontera y grenspolitie a actua automaticamente y deten’e”, asina Ann Angela, vocero di Ministerio Publico a confirma awe mainta.
“El a wordo laga bay relativamente lihe pasobra el a duna tur claridad durante interogacion y no a mira motibo pa ten’e mas largo. Investigacion no ta cla ainda, pero e ta alvast liber pendiente e investigacion”, asina husticia a confirma un rato pasa.
E detencion aki a hala atencion hasta na Corsou, debi cu e ehecutivo ta procedente di nos isla ruman. Aki na Aruba mester bisa cu e señora tabatin e tarea pa canalisa e proceso di reorganisacion den aeropuerto, unda decenas di trahado a bay cas, sea boluntariamente cu un pakete of door di disolve nan contract di trabou via hues. Consecuentemente e nivel di popularidad den compania no ta mucho halto.
Riba e pregunta dicon polis mester a bay deten’e na pia di trabou y na boei, siendo cu e sospecho no tin nada di haber cu su trabou, a aclaria cu ta door cu e ta traha na aeropuerto, ora sali ordo di detencion e ta “red flag” mesora na fronteranan y a opta pa deten’e eynan mes mesora. A subraya si cu e ta un sospechoso ainda y e caso ta bou di investigacion.
