Den un carta firma pa abogado mr. Anthony Ruiz di e bufete Croes Wever & Ruiz (liga na Gabinete Wever-Croes), a haci un peticion pa rectificacion di parti di Nelson “Speed” Andrade y Patrick Paskel, pa expresionnan uza contra di Minister di Enseñansa y Deporte, Jan Hendrik “Endy” Croes. Esaki ta di dos intento di e minister y su abogado, pa purba silencia of “spanta” e dos periodistanan cu ta presenta e programa mas mira na Aruba, pero cu audiencia grandi den henter Reino Hulandes.
Ya den pasado e mesun abogado, cobrando Pais Aruba, a manda un carta pa Ministerio Publico, demandando pa investiga ambos periodista penalmente pa expresionnan haci contra dje mes y contra Minister Endy Croes. Despues cu recherche a scucha e periodistanan, hopi luna pasa, a bin un periodo di silencio.
Ta asumi cu fiscal no a bay di acuerdo cu e bufete “Niet Zomaar Iemand” y a pasa nan carta den un mashin di “shredder”. Awo ta purba atrobe via e caminda civil.
Endy Croes tabata sospechoso pero no convicto
Den e carta fecha dia 19 di april 2024, abogado mr. Anthony Ruiz ta skirbi cu “Nos cliente, sr. Endy Jan Hendrik Croes, a acerca nos den priva y den su calidad di Minister di Enseñansa y Deporte, cu consideracion di lo siguiente. Durante e transmision en bibo di e programa di radio Enfoke via e stacion di radio Bo Guia 88.9 FM, di cual boso programa tambe ta transmiti via e pagina di Facebook y e canal di YouTube di 24ora.com di dia 9 di april 2024, sr. Paskel a yama e cliente ‘convicto’ den e minuut 1: 00: 22 relaciona cu supuesto iregularidad cu a sosode na Fundacion Lotto Pa Deporte ora e cliente tabata miembro di e hunta directiva y despues director di e fundacion aki. Den e contexto den cua Sr. Paskel a uza e palabra aki, esta hunto cu e palabranan of sentencia ‘ex-detenido,’ deteni na Landsrecherche’,’ sospechoso’ y ‘e tabata parti di e cadena hudicial pero como sospechoso acusa’. Na minuut 1:01: 11, sr. Andrade a expresa y enfatisa e declaracion di sr. Paskel ‘convicto’ cu e palabranan ‘convicto di husticia’. E declaracionnan ‘convicto’ y ‘convicto di husticia’ no solamente ta obhetivamente incorecto y completamente falso, pero tambe innecesariamente ofensivo y dañino pa e cliente. E ta afecta gravemente honor y bon nomber di e cliente tanto den priva como den su calidad di minister. Bo sa bon cu e declaracionnan aki ta incorecto y completamente infunda basa riba e decision di Corte comun di Husticia di 28 di november 2012 den cua a exclui e cliente for di e huicio di tur acusacion y a duna e publicidad necesario na tempo despues via conferencia di prensa y publicacion”.
Demanda pa rectificacion
Den bista di loke ta ariba menciona, Bufete Croes, Wever & Ruiz a pone ambos presentado na altura cu e minister ta desea pa corigi e expresionnan menciona anteriormente prome cu diamars 23 di april 2024 prome cu 2:00 pm, riba e mesun stacion di radio “Bo Guia 88.9 FM” y den e mesun programa “Enfoke 90”, transmiti tambe en bibo via e pagina di Facebook y e canal di YouTube di 24ora.com – sin duna ningun comentario of refutacion. “Si no cumpli cu e citacion menciona anteriormente pa corigi den e termino prescribi, nos lo ta obliga, sin aviso, pa obliga pa hacie den corte. Mara na tur derecho y defensa”, asina abogado mr. Anthony Ruiz a finalisa bisando.
Reaccion Paskel & Andrade
“Nos a manda e carta pa nos abogadonan cu lo repas’e den fin di siman pa dialuna duna nos un conseho huridico. Abogado Ruiz obviamente kier hunga cu palabra pero e tin cu compronde cu nos tin mucho mas caya cu ne. Si nos ekipo huridico conseha cu mester rectifica, nos lo hacie tambe”, asina Patrick Paskel a reacciona riba nos pregunta di kico lo haci awo.
Weg’i palabra
Aki por considera cu ta hungando cu palabra y purba revisa si hues lo cay den e wega di e contexto di cada frase expresa den Enfoke. Cu Endy Croes tabata cera no ta un secreto, pasobra henter Aruba a sigui su caso di Lotto pa Deporte. Y penalmente, pa Landsrecherche por cera bo, bo mester ta un sospechoso. Hende inocente y liber di pica no ta bay cera! Locual a pasa aki ta un echo historico, ora cu PG Robert Pieters e tempo ey a dicidi pa laga e caso penal contra Endy Croes cay y pa laga e gobierno di AVP persiguie civilmente. Como tal, e nunca a haya un sentencia penal, sino civil, den cual hues na Aruba, den apelacion y den casacion a haya cu ta legalmente proba cu el a enrikese su mes y su famia cu placa di Fundacion Lotto pa Deporte. Loke a pasa ultimo ta cu Croes a demanda Ernst & Young Accountant pasobra nan lo no a dun’e un trato husto den nan investigacion pa conclui cu el a comete mal maneho y a enrikese su mes. E caso ey ta andando keto bay den apelacion.
E caso di “Lotto”
Despues di tabata basta aña miembro di Hunta di Directiva di Fundacion Lotto pa Deporte, dia 1 di april 2009 a dicidi di nombra Jan Hendrik “Endy” Croes como director di e fundacion. A dun’e un bunita salario di Afl. 14.500 pa luna, mas un cantidad di beneficio secundario.
Den e par di lunanan cu el a dirigi e fundacion, el a haci su mes culpabel na mal maneho y enrikisimento personal, cu dia 4 di januari 2010 caba nan a mand’e cas y pon’e riba “non-actief”, pa Ernst & Young por a haci un investigacion. Dia 30 di juni 2010 a suspende (schors) for di su funcion formalmente, despues cu a haya e rapport final di accountant.
Cu esey e fundacion a pidi corte pa desolve e contract laboral cu Endy Croes y den sentencia di dia 14 di september 2010, hues a duna e fundacion rason pa kit’e “wegens gewichtige redenen bestaande uit een uitgestelde dringende reden”. Endy Croes a apela y dia 22 di juli 2011 corte a nenga su apelacion. E no a keda contento y a bay den casacion y dia 30 di november 2012, Hoge Raad a subraya e sentencia di Corte Comun di Caribe Hulandes y a duna Fundacion Lotto pa Deporte rason pa kit’e fo’i trabou.
Mester menciona cu despues di esaki, na aña 2012 a opta pa cana e trayecto penal. A detene Endy Croes na su cas dia 11 di april 2012. Pero na un forma cuestionabel, e Procurador General di e tempo ey a opta pa laga e trayecto penal cay pasobra cu e trayecto civil tabata canando caba. Di e forma ey tres corte a condena Endy Croes na nivel civil pero aunke e tabata sospechoso y tabata cera pa investigacion, e nunca a haya un sentencia penal.
Tocante Endy Croes
Jan Hendrik Croes, miho conoci como Endy, a logra su diploma MBO como analista kimico na aña 1989 y na 1991 a obtene su Associate’s Degree den e mesun ramo. E tabata presidente di Fundacion Lotto Pa Deporte, despues a bira director di Fundacion Lotto pa Deporte, promotor di evento, presidente di Aruba Softball Bond y vice presidente di World Baseball Softball Confederation. Na aña 2010 a investig’e y kit’e for di Lotto pa Deporte pa mal maneho y pa enrikece su mes y famia.
Djey el a drenta politica y riba lista di MEP el a haya 509 voto den su prome salida den eleccion na 2013. El a crece na 850 voto den eleccion na aña 2017 y den e ultimo eleccion na aña 2021 el a sigui crece te na 1006 voto. A nombr’e como Minister di Enseñansa y Deporte. E ta e minister cu menos voto individual den e coalicion MEP-Raiz.
Tocante Headlines Group
Mark-Benson Denz a funda e prome website di noticia na Aruba, 24ora.com (Prome den Noticia) dia 28 di maart 2007. Awendia e ta e medio di comunicacion di mas grandi den Caribe Hulandes. Diariamente mas di 25 mil diferente usuario ta subi online, mas di 4 biaha y ta keda casi 3 minuut cada biaha. Pa siman ta surpasa 75 mil usuario y pa luna e ta mas di 225 mil diferente usuario. Riba Facebook nos ta e pagina di Aruba cu mas “likes” (124K), mas siguido “followers” (192K) y tambe cu hopi mas “engagement”. E mas reciente adkisicion ta e corant digicel TREMPAN, cu mas pagina, mas contenido y hasta video pa lesadonan y usuarionan por disfruta di dje digitalmente.
Den aña 2023, e website mas mira na Aruba, esta 24ora.com, a crece den audiencia, cu siguidonan cu a consumi 43,206,312 minuut riba e website. A cera aña cu no menos di 123.975 likes riba Facebook, mientras cu e cantidad di siguido (followers) tabata 188.218. Riba Instagram nos tin 23.000 siguido. Cifranan aki ta marca un crecemento grandi compara cu e aña prome.
