Ta evaluando pa cera frontera cu Aruba: Corsou ta desconseha biaha pa Aruba

6963

Teniendo cuenta cu e ultimo desaroyonan rond di contagio local di Coronavirus, awe tardi Gobierno di Corsou a emiti un conseho negativo pa biaha pa Aruba. Te ainda no a tuma un decision final riba ceramento di frontera oficial cu nos isla, aunke cu no ta parce cu e decision ey ta mucho leu. Boneiro tambe ta evaluando e mesun decision aki awor, den cuadro di proteha nan ciudadanonan di contagio.

Ayera dialuna Aruba a raporta 5 caso di hende local cu a contagia cu e virus, sin cu nan a biaha. Esey ta nifica cu tin un contagio local y cu ainda no a logra identifica e fuente. E 5 hendenan di ayera no conoce otro y no tabatin contacto cu otro tampoco, pues nan cada un a contagia di un forma diferente. Mester bisa cu den e 5 hendenan aki, tin un pareha.

Awe e situacion no a bira miho y atrobe a identifica 5 persona mas cu a test positivo pa Covid-19. Danki Dios ningun di nan tin sintoma ainda y no tin ningun pashent interna den Hospital tampoco cu Covid-19. Pero mirando cu e casonan awor ta di ciudadanonan den luganan publico, manera gym, bar, restaurant y hasta den Departamento di Gobierno DPL, cu ta teme cu e contagio lo por plama hopi mas bou di nos ciudadanonan.

Gobierno ayera caba a anuncia medidanan di precaucion pa evita mas contagio local y a urgi comunidad pa bisti mondkapje ora sali den luganan publico cu no por garantisa distancia social di 1,5 meter. Ta keda na cada un di nos hendenan pa atene nos mes na e normanan y reglanan nobo anuncia pa Gobierno. Si esey no sosode y mas caso sali padilanti, lo por spera mas medida, cu lo por inclui un scenario di “Shelter in Place” y “Toque de Queda” atrobe.