“Sky is the limit”, esey ta impresion cu trahadonan tin relaciona cu maneho di e Director nobo di Serlimar. Ta conclui esey despues di nota con ta haciendo inversionnan grandi, sin un plan su tras of conocemento di e materia. Asina a cumpra trucknan nobo sin tene cuenta cu mester lona pa tapa e bakinan. Consecuentemente, te awe trucknan nobo ta para sin por uza.
Ta trata di trucknan cu a yega pa lanta e bakinan grandi di sushi. E trucknan aki tin mas cu dos luna para sin por subi caya. Esun cu a firma pa e trucknan, Marelva Wever, a haci pedido di cuater truck pero no a pidi pa e lona inclui. Pa pedido mal haci e trucknan awor no por subi caya. E trahadonan kier sali pero no por pasobra e lona mester tey pa tapa e baki cu sushi riba camindanan publico. Tin 3 truck para den Serlimar na Kockstraat y 1 truck riba tereno di dump na Parkietenbos.
Tambe riba e tereno di Dump tin e Incinerator chikito cu a cumpra. Keto bay no a instal’e. Placa para tin riba tereno di Dump. Henter e proceso di destaho publico a bay di un forma cuestionabel. Ex Minister Booshi Wever a lansa hopi pregunta, special cu Minister awor mester paga e compania Johnson Enterprizes cu tin un contract y riba dje paga e compania cu a gana e destaho awo, cu pa casualidad ta di bisiña di e Minister y ta un sponsor grandi di e grupo di carnaval TOB!
Na oficina di Serlimar na Pos Chikito tambe a haci full un otro show cu reciclahe. A huur e luga un aña pasa bou pretexto cu lo hiba material pa recicla. Despues di un aña di drechamento cu bashamento di vloer den un localidad pagando riba 40 mil florin pa luna, awe por mira claramente cu esaki ta un flop total. Pa dia menos cu diez palet ta drenta na e centro di reciclahe na Pos Chikito. Esaki ta un huur simplemente pa complace un sponsor di campaña.
Pa colmo algun dia pasa un flatscreen masha grandi a disparce for di e edificio na Pos Chikito. Tur hende encarga cu maneho a keda keto. Ta purba sconde e ladronicia di flatscreen grandi na Serlimar.
Pa colmo sindicato STA, cu awe ta liga na e Gobierno na mandi, ta purba papia bon di Serlimar y ta intimida trahadonan cu kier protesta. Na lugar di para banda di e trahadonan y stop abuso, awe ta para banda di gerencia cu ta abusa di e trahadonan.
Un conclusion tin, Minister a nombra un Director cu e por manipula y sigui fiesta. Serlimar tin debenan halto varios caminda. E situacion financiero ta hopi malo y hopi di e debenan mas grandi ta debi na favoritismo cu Minister mes a hinca Serlimar aden pa complacencia. Awe mas cu nunca Serlimar ta den un situacion pesimo y trahadonan ta demotiva pa maneho y trato inhusto tumando luga.
