Awe merdia alrededor di 2:00pm bisiñanan den Bleenchistraat na Simeon Antonio a bati alarma na Polis, Brandweer y cu Ambulance pa Ramon “Panela” Garcia cu tabatin tres dia sin sali for di cas. A purba bati na porta pero no a haya atencion. Polis y Brandweer a bin kibra e porta, bay paden y topa nos colega t amigo malo na cama. Paramediconan di Ambulance a activa mesora y a logra stabilis’e pa despues transport’e cu urgencia pa Hospital pa tratamento medico specialisa.
Un rato pasa nos a haya confirmacion di Hospital cu nos colega ta for di peliger, ta stabiel y a pas’e pa un camber den Hospital pa e ricibi tratamento medico pa recupera di e situacion cu e tabata aden.
Un danki special ta bay na e bisiñanan atento cu a bati alarma asina cu a nota un situacion straño cu Ramon. Ta un hende di tur hende, semper cla pa yuda tur hende y cu diripiente a haci falta den bario, pasobra no tabata mir’e. E lo a bisa un bisiña cu e no ta sinti su curpa mucho bon y pesey mes a pone extra atencion pe den e dianan aki.
Nos ta desea Ramon un pronto recuperacion, cuida curpa mas y cu pronto e por ta bek cerca nos como un colaborado fiel di 24ora.com.
