Despues di mas di tres decada den mundo di musica y di a biba y traha na Alemania, Hulanda y varios otro pais na Europa, e cantante y musico Tipa Man a regresa Aruba despues di 22 aña. Na e ocasion aki, e artista ta celebra su cumpleaños number 70 cu un presentacion special pa su publico.
Durante su carera musical, Tippaman a actua den varios pais na Europa, incluyendo Italia, Spaña, Francia, Belgica, Austria y Suisa. Tambe el a presenta den diferente ciudad na Alemania, manera Köln, Hamburg, Frankfurt, Stuttgart y Koblenz.
Un presentacion special cu un musico di Alemania
Pa e celebracion aki, Tipa Man a trece e pianista y areglista Robert Nigger for di Alemania. E musico ta duna les na e conservatorio Musik-Hochschule na Mönchengladbach.
E presentacion lo tuma luga na Sandra’s Garden, caminda e publico lo por disfruta di e estilo musical di Tippaman, cu ta combina reggae y funk, hunto cu influencia di reggaeton y musica na Spaño.
“Ami no ta stop di canta. Ora bo ta den bo gloria, e musica ta keda den bo. Cu microfon of sin microfon, e pasion aki ta mi bida”, Tippaman a declara, haciendo enfasis riba e amor profundo cu e tin pa musica.
Grabacion di musica nobo na Aruba
Ademas di su presentacion, Tippaman ta prepara pa graba musica nobo na studio di Rooi Taki. E grabacionnan lo inclui cancionnan di reggae y funk.
E cantante tambe a destaca cu profesionalismo, puntualidad y respet mutuo ta elemento importante pa mantene un bon nivel den industria musical.
Cu su regreso na Aruba, Tippaman ta celebra no solamente su cumpleaños, sino tambe su trayectoria musical y e pasion cu a acompaña dje durante tanto aña. E artista ta invita henter comunidad y tur amante di bon musica pa bin disfruta di e presentacion special durante e fin di siman.
