Durante un reunion cu Minister-President Eman, a trata e retonan cu e islanan chikito di Caribe ta enfrenta pa haci e transicion energetico, specialmente den e sector marino. Un di e puntonan principal tabata e posibilidadnan pa cooperacion entre sector publico y priva.
Amaranta Ringeling, CFO di De Hoge Dennen a indica cu e reunion a brinda hopi informacion util tocante e iniciativanan cu Aruba ta desaroyando den e area di cambio climatico y transicion energetico.
Aunke e combersacion ainda ta den fase exploratorio, tabatin un maneho di inversion cu ta activo den Caribe presente, cu por ta interesa pa investiga posibilidadnan di inversion na Aruba.
Segun Ringeling, Aruba ta destaca como un ehempel den Caribe den e lucha contra cambio climatico. E a expresa su orguyo como Arubiano di tende e reconocemento y di mira e pasonan cu Aruba ta tuma pa avanza den e area aki.
Di su banda, Prome Minister Mike Eman a indica cu durante e encuentro, a presenta debati diferente iniciativa enfoca riba conservacion di naturalesa, proteccion di lama y e transicion energetico pa Aruba. Ta explorando acceso na fondonan di financiamento internacional y Europeo.
Tres area principal pa inversion
Durante e reunion, a identifica tres area den cual Aruba por beneficia di posible fondo internacional.
· Parkenan nacional y conservacion di naturaleza: Un di e prioridadnan ta fortalece y amplia e trabou di organisacionnan manera Aruba Conservation Foundation (ACF), cu ta dedica na proteccion di naturaleza y conservacion di biodiversidad. E financiamento por contribui na e sostenibilidad financiero di e esfuersonan pa conserva e rikesa natural di Aruba.
· Transicion sostenibel den turismo y comercio: Un otro area ta e transicion di empresanan den sector comercial y turistico pa practicanan mas sostenibel. Esaki por inclui hotel, compania di watersport y otro negoshi cu por adopta vehiculo y boto electrico, reduciendo asina nan impacto riba ambiente.
· Desaroyo di conocemento y investigacion cientifico: E tercer area ta enfoca riba fortalece investigacion y conocemento cientifico na Aruba. E presencia di institucionnan di investigacion, manera Wageningen University & Research, por contribui no solamente na soluciona desafionan local, sino tambe na desaroya y comparti conocemento cu por beneficia otro pais y isla den region Caribe.
Dialogo cu comunidad y sector marino
Un di e temanan mas importante durante e encuentro tabata e necesidad pa involucra comunidad local, piscadonan y empresanan di watersport den e decisionnan relaciona cu e proteccion di e ambiente marino y e desaroyo di un parke marino.
A enfatisa cu medida di conservacion mester sali for di dialogo y cooperacion cu e personanan cu ta depende di lama pa nan actividad economico. Pa logra esaki, ta contempla e organisacion di consulta publico unda e diferente partidonan por comparti nan opinion y preocupacionnan.
E meta ta busca un balansa entre proteccion di coral y bida marino, y e continuacion di actividadnan economico di un manera responsabel.
Un oportunidad pa un futuro mas sostenibel
E exploracion di fondo internacional por habri porta pa Aruba fortalece su iniciativa ambiental y acelera e transicion pa un economia mas sostenibel. Sin embargo, e siguiente pasonan lo depende di e posibilidadnan concreto di financiamento, e preparacion di proyectonan y e cooperacion entre gobierno, sector priva, organisacionnan ambiental y comunidad.
Cu e enfoke aki, Aruba ta busca combina proteccion di su recurso natural cu oportunidadnan economico cu por beneficia generacionnan actual y futuro.
