Diabierna despues di 7:00PM patruya di Polis a bay na e rotonde di Santa Cruz pa atende cu un accidente entre dos auto. A drenta informacion cu un homber posiblemente bou di influencia, tabata busca problema eybou tambe. Na e sitio a haya dos auto riba e rotonde.
E taxi van blanco tabata bini di abou y a subi rotonde caba, ora for di zuid a bin un Suzuki Swift maneha pa un chauffeur femenino, cu tabata bin cu velocidad y no a regula esaki na tempo. No por a evita e impacto mas y aki e Suzuki Swift a dal den e banda drechi dilanti di e taxi van blanco. Un rato despues a presenta un homber cu aparentemente tabata e pareha di e dama chauffeur y a cuminsa haci fastioso.
Debi na su comportacion a didici di yama Polis. Polis a yega rapidamente y a interveni p’e situacion no sali for di man. Den e Suzuki tabatin dos mucha cu a resulta levemente herida. E muchanan a dal nan cabes durante e impacto.
Polis a pone e chauffeurnan hala nan auto for di e rotonde pa asina alivia e trafico cu tabata un tiki pega, mientras tabata warda riba e ambulance p’e dos muchanan. Ora ambulance a yega, e paramediconan a laga e dos mucha subi ambulance pa un check up medico, pero no tabata necesario pa hiba nan hospital. Despues cu Polis a tuma tur dato, ambos partido a sigui nan caminda.
