Nada ta mas dificil y sigur pa tuma curashi y inteligencia, di tuma decision importante den bida, specialmente ora ta trata di un decision, cu ta inclui bienestar y desaroyo di un pais, su autonomia y su finansa publico.
Esey ta pensamento di parlamentario Sue Ann (MEP) riba e anuncio di e plan multifrontal presenta pa lider di partido Evelyn Wever Croes. Segun Ras, como hende muher den e mundo di politica, esaki ta pisa mas ainda, specialmente si bo ta Prome Minister. Nos tin cu realisa cu liderazgo ta aplicabel den tur area di bida y hopi di e idea- y habilidadnan cu nos ta papia di dje, ta un herencia cu den transcurso di bida, bo ta siña y adkiri.
PLAN MULTIFRONTAL
E siman aki nos Prome Minister, sra. Evelyn Wever Croes a anuncia un plan multifrontal pa pais Aruba, pa asina purba evita un KB (Koninklijk Besluit) y/of ‘instruccion’, cu sigur por nifica perdida di nos autonomia. Pa Ras, e topico aki sigur ta keda uno hopi delicado, como tambe importante pa cada un di nos cu ta stima e baranca aki. “Ta bon pa enfatisa y argumenta, cu e decision aki, ta uno cu ta afecta cada un di nos, pero na final lo ta un beneficio y garantia pa nos futuro generacion”, Ras a sigui bisa. Introduciendo e ‘crisisheffing’ di 2.5% no ta nada mas cu un accion pa asumi responsabilidad di un mal gobernacion anterior. “Y ta inaceptabel pa sikiera pensa, cu Hulanda no tabata medio complice di tur e mal maneho financiero aki”, Ras a sigui bisa.
CORE PA RESPONSABILIDAD
Lamntbel ta segun e parlamentario, cu awo cu e situacion ta asina precario, e instancianan envolvi ni e miembronan di gobierno anterior (di AVP) kier asumi responsabilidad y realmente bin dilanti y bisa, cu nan a faya. Un biaha mas ta demostra cu nan ta prefera para na banda y punta dede riba tur hende, menos nan mes. “Esaki ta un refleho hopi cla den nos comunidad tambe, unda cu hopi di nos, ta prefera di apunta y exigi otro pa asumi responsabilidad propio”, Ras a sigui bisa.
LIDERAZGO FUERTE
“Como hende muher, mi ta sinti mi orguyoso di e forma con nos Minister President a asumi e responsabilidad pa cuminsa na drecha e situacion financiero caotico aki, cu un actitud determina, positivo y papiando e cosnan manera nan ta cu argumento y echo, sin tin mester di haci espectaculo y cos di mucha chikito of mucha malcria”. Segun e parlamentario, pais Aruba mester di hende cu ta realmente capaz di tuma decision, pasobra e decisionnan ey ta loke ta mantene e pais aki keda move den e direccion corecto. “Y ta den momentonan asina, liderazgo cu ta fuerte, inteligente y sin miedo ta loke ta rekeri pa asumi”, Ras a finalisa bisando.
