Ora hende ta stima Dios nan ta haci bon y Dios mes ta wanta nan firme riba su caminda.
Den e tempo malo aki yen di critica, yen di envidia, yen di manipulacion y corupcion.
Caminda hende a perde respet pa nan mes, y pa Dios, nan ta rechasa Dios cu nan actitud, hende vengativo cu no kier pordona.
Nan ta nenga bon y sigui haci malo. Hende kier domina hende y nos tur ta mirando tur dia con maldad ta avansa, pero tambe nos ta mira e misericordia di Dios ta sali manera un mantel y proteha su yuinan .
Tene bon cuenta cu ora nos uza e palabra corupcion, no tin nada di haber cu politica ni politico, pasobra tur locual ta wordo haci scondi bou di man ta corupcion. Tur locual ta impuro den bista di Dios ta corupcion.
Si bo cumpra cos horta ta corupcion, si bo sconde cos horta ta corupcion, si bo ta bende droga bo ta un corupto, si bo ta infiel na bo esposa/esposo bo ta un corupto, si bo ta participa den bruheria/idolatria/ santeria/ bo ta un corupto, gañamento ta corupcion etc. Pero Dios ta fiel, husto, Su amor ta eterno. Si bo arepenti di tur esakinan, aparta for di maldad y caminda di maldad, entrega bo bida na Hesus Cristo, Dios ta pordona bo pica (1 Juan 1 vers 9) (2 Cronicas 7 :14+15).
E tempo cu nos ta bibando aden ta manera e tempo di Noe (Genesis Capitulo 6) pero nos tur ta lesa y compronde segun Mateo capitulo 24 e cosnan lo bira pio, pasobra ta Hesus mes a bisa cu esey lo sosode. Pero nos tin un speransa pa bo cual ta skirbi den Lucas Capitulo 21 vers 36 Hesus ta bisa: Ma sea alerta tur ora bay, haciendo oracion pa boso por tin forsa pa scapa di tur e cosnan aki. Y pa para dilanti di e yiu di hende.
P’esey nos tin di Stima Dios, haci Bon y para Firme, pasobra si nos curason ta carga cu paranda, buracheria y e preocupacion di bida, e dia aki lo bini diripiente riba nos manera un trampa.
Noe a pasa 120 aña trahando e Arca memey di tur critica. Nan a yam’e loco, insult’e, pero den tur esey e tabata predica e palabra bisando cu e fin ta cerca, pero e hendenan no kier a kere.
Awo como Noe a haya gracia cerca Dios. Su famia tambe a wordo bendiciona, pasobra Dios a bise drenta abo y bo famia den e arca y Señor Dios a cera e porta di e arca.
Aki nan nos por mira e amor cu Dios tin pa famia. Un homber y un hende muhe a uni y nan a forma un famia y den tempo dificil, Dios a mantene nan hunto y Dios a salba nan.
E tempo aki no ta miho cu e tempo di Noe. Tur caminda tin problema, guera, pester y hopi cos mas, pero di tur e cosnan aki nos por libra si nos kere den e unico Yiu di Dios cual ta Hesus Cristo nos Señor y entrega nos bida na dje y asina nos lo tin bida eterna.
Ora bo haci bon pa hende, no worry si bo no haya danki. Sigui stima, sea humilde y si bo tin di ripiti bo bondad, bolbe hacie. Pasobra tin un premio grandi ta spera bo den shelo.
