Stellaris Casino di Aruba Marriott Resort a lansa nan campaña “Coolest Cooler” hunto cu Tropical Bottling Co. specialmente p’e temporada di carnaval. Asina e casino mas grandi di Aruba ta contribui p’e esunnan cu ta disfruta di Carnaval 65 por tin algo pa haci nan bida un tiki mas facil durante paradanan banda di caminda. Claro e jug moderno aki ta apto pa sigui uza pa hopi aña mas despues di carnaval.
E campaña a start diahuebs ultimo p’e hungadonan di casino pero lo conta tambe pa tur miembro nobo cu inscribi y hunga eyden den e siguiente dianan. Ta acumula punto cada siman cualificando pa e sorteo. Lo saca e top score cu lo gana e “Coolest Cooler”. Mester acumula 1000 punto di diahuebs pa diaranson pa participa den e sorteo den cual lo regala 10 jug yena cu productonan di Tropical Bottling Company.
E campaña no ta solamente den casino, pero tambe durante e 4 paradanan grandi, esta Parada di Luz na San Nicolas, Lighting Parade, Paradanan grandi di San Nicolas y Playa. Publico den banda mester mustra un producto di Bacardi, Chill of Dewar’s of tambe un players card di Stellaris Casino y Bo ta participa, asina Yazira Javois-Feliciana, Director Marketing & Slot Performance, a indica. E promo girls di Stellaris Casino lo ta den Infinity Carnival Group partiendo un scratch & win durante e parada. Lo por gana premionan entre $5 te cu 250$ na free play, tambe por gana productonan di Dewar’s, Chill, Bacardi, T-shirt, pechi y hopi premio mas, incluyendo e “Coolest Cooler”.
E jug aki ta hopi innovativo cu componentenan cu Bo lo gusta di dje, asina Jamil Maduro, Casino Executive Host, a splica. E ta un mini bar y por bay cun’e tur caminda. E parti dilanti di e jug ta bin cu un opener y e parti patras ta magneet cu ta gara e tapa di cerbes, tambe ta bin cu trekker di biña y un luga pa warda cos na e parti dilanti. E jug por wanta ijs pa te cu 5 dia y e ta bin cu tayonan, cuchiu di ceramica y un divider cu por uza como un cutting board. Tambe e ta bin cu blender, LED lights, bluetooth speaker y sin lubida un USB portable charger pa bo celular. E bateria den e jug ta recargabel.
Tropical Bottling Co. ta contento di forma parti di e campaña cu Stellaris Casino den Carnaval 65, asina Lizzi Arends, representante di mercadeo di Tropical Bottling Company a expresa. E campaña ta interactivo cu publico para banda di caminda durante paradanan di carnaval. Tropical Bottling Co. ta corda tur hende cu pa participa mester tin 18 aña pariba.
Pronto Stellaris Casino lo lansa nan “app” pa celular cu por download, e “Coolest Scavenger Hunt”. Asina cu download esaki, Stellaris Casino lo manda tarea na e participante cu tin di cumpli cun’e. E scavenger hunt aki lo bay te cu 28 di februari. Si logra cumpli cu tur tarea, lo gana un “Coolest Cooler”.
