E situacion na companianan estatal no ta “koek en ei”, manera e dicho na Hulandes ta bisa. Na diferente ocasion, na ELMAR a trahadonan a bay den accion despues cu den forma unilateral a kita placa for di nan salario.
Ta parce cu e weganan aki no a caba. “E weg’i djaca ta sigui na ELMAR, “ ta loke e presidente di sindicato STA Diego de Cuba a bisa den un declaracion. E ta bisa e expresion aki pasobra a informa e empleadonan cu ta stop cu e proceso di kita placa di nan salario, pero toch el a sosode.
E trahadonan ta dispuesto pa coopera, de Cuba, pero e manera cu ta implementa e decision ta loke nan tin masha problema cu ne. E sindicato a cuestiona e autoridad of e forma con e director ta haci uzo di su autoridad, kibrando reglanan di contracto colectivo cu tin vigente.
E sindicalista ta kere cu tin formanan cu ta hopi mas solidario pa cu e pueblo di Aruba y nan tin sugerencia cu por yuda. Pero esey ta si e director of e compania Utilities kier sinta na mesa pa delibera.