Sindicatonan FTA, SIWA, STT, ALVAST, STA a reuni cu Parlamento riba e hecho cu Hulanda ta forsa Aruba den un sistema salarial nobo, EWC-norm, p’e posicionnan halto. Specialmente den companianan estatal di gobierno y basa riba esaki nan a papia cu Parlamento.
Diego de Cuba, presidente di STA, no a duna hopi detaye di kico tur nan a papia den Parlamento, pero mester warda. E sindicatonan a compronde for di minister cu e ley a bay Raad van Advies pa haya sa kico t’e conseho cu nan ta bin cu ne. De Cuba ta kere cu despues di esey Parlamento lo pasa riba dje y invita nan pa un otro reunion.
E sindicatonan ta gradici cu Parlamento a reuni cu nan, pero no por bay den hopi detaye. De Cuba a sigui bisa cu no tin ley, no por papia hopi riba dje. Sindicatonan ta contento cu nan por a hala atencion di Parlamento riba esaki prome cu e ley yega nan.
Sindicato mester ta proactivo. Nan no sa si e ley nobo aki cu Hulanda kier forsa lo tin conscecuencianan pa trahado chikito, cual sindicatonan ta representa. Semper ta deber di sindicatonan pa defende nan y purba evita cu e sla aki pa nan. Nan a analisa e documento den lineanan grandi y ta mira cu esey no lo bay sosode, segun de Cuba. Prome cu implementa un ley asina aki, mester studia esaki bon. “No ta asina cu bo por laga Hulanda bin eherce un presion,” el a bisa.
Aworaki den temporada di crisis y practicamente e ta pusha lansa den garganta. E ta di pensamento cu esey no por y STA ta sinti cu Hulanda ta completamente fout. Kier forsa pa cosnan sosode den un tempo cortico y den crisis, pasobra ni den tempo normal cos ta bay asina. Nan kier pa regla tur cos awo den un tempo record.
