Dialuna mainta a tuma luga reunion yama pa Edgar Vrolijk, presidente di comision di companianan estatal hunto cu e diferente sindicatonan cu tin representacion den e companianan, cu a resulta un reunion sumamente fructifero.
Candelaria di su banda ta recorda cu locual ta contenido di reunion ta algo cu no ta divulga ni comenta riba dje pero locual cu su persona mes a remarca cu ta bon cu e reunion a tuma luga y cu ta algo cu tin cu continua.
E ley riba su mes no a yega Parlamento ainda, pero na momento cu ricibi esaki ta algo cu mester haya su atencion. Ta un ley cu ta carga e nomber di Wever Croes norm y cu tin cu bay regla e norma di salario di tur funcionarionan den top di cierto departamentonan di gobierno y kico lo bira e salario cu cada un di e funcionarionan aki lo tin cu bay gana.
Robert Candelaria ta di punto di bista cu ta algo cu mester atende y discuti ampliamente mirando cu e discusion lo tin diferente banda pa tene cuenta cu ne.
Den opinion publico, e funcionarionan aki lo ta gana suma cuantioso como salario pero di otro banda un persona cu kier mira den e funcionnan ey ta personanan cu experiencia, conocemento, habilidad pa dirigi e companianan aki. Mester tene na cuenta cu di otro banda companianan priva ta paga e funcionarionan aki e sumanan aki basa riba nan experticio, cu despues cu e ley aki pasa no por tuma luga mas.
Ta importante cu na momento cu kier profesionalnan di calidad / di peso pa guia organisacionnan cu ta companianan estatal, mester paganan conforme e exigencianan tambe.
Pregunta cu lo tin cu discuti riba dje ta kico lo ta husto como cifra (salario) pa e funcion en cuestion.
Candelaria ta remarca cu esaki ta locual cu tin cu sigui reuni riba dje, sigui discuti pa yega na normanan cu ta aceptabel den e empresa, aceptabel pa e profesional cu lo kier asumi e posicion pero tambe aceptabel den comunidad.
