Diamars atardi alrededor di 4:00 pm a inicia un reunion importante den Cocolishi. Segun informacion ricibi, Minister Geoffrey Wever hunto cu algun minister mas tabata presente den e reunion aki. Parce, a atende e topico di gasolin, unda cu Minister Wever a propone na CAFT pa por absorba e aumento di prijs di gasolin. Pero no por confirma ainda kico tur a palabra of dicidi.
Mañan mainta Minister Wever ta den un conferencia di prensa di gobierno caminda e lo elabora mas riba e topico di gasolin. Recientemente su colega, Minister Xiomara Maduro a anuncia si cu; e minister encarga cu economia ta bezig cu un plan.
E mandatario encarga cu economia a sali for di Cocolishi te despues di 8:00 pm, cual no ta un orario usual cu e ministernan sa keda na trabou. Normal, sa mira nan ta sali den careda di 5:00 pm y tin algun hasta prome cu 3:00 pm ta na cas caba of haciendo compras den supermercado.
Minister Maduro na su salida for di Cocolishi den e auto luhoso glas preto a opta pa no baha bentana y comenta riba e reunion, aunke su coleganan Endy Croes y Geoffrey Wever si a comenta cu; nan no sa di nada y cu e reunion no tabata nada particular.
