Tin un discusion riba un criatura cu a haya accidente, un turista. AZV no a yuda. Hopi hende ta puntra dicon AZV no a yuda. Solange Tchong, vocero di AZV a comenta cu nan a tuma nota di e caso aki. Por mira hopi cla cu e ta trata di un turista, esta un persona cu no ta biba na Aruba. AZV a wordo institui pa e publico biba na Aruba. Ley mes ta defini bon cla ken ta e personanan cu por wordo yuda pa haya cuido medico den exterior.
Den e caso aki AZV tambe a tuma nota cu ta trata di un accidente di un turista, na unda un menor di edad a accidenta lamentablemente hopi grave y esey a haci cu ya eynan caba bo ta bay wak e ora kico ta e situacion. Un di e cosnan cu a tuma luga tabata e evaluacion, kico ta e status. Den e caso aki, e ta un turista. Esey kiermen cu e no ta biba na Aruba. Automaticamente ta yega na e conclusion cu no tin AZV.
Kico ta bay haci despues, ta pa evalua ki tipo di seguro medico of seguro e persona aki, den e caso aki door cu ta un mucha, e mayornan por a cera pa e mucha menor di edad. Pa AZV e no ta un caso na unda cu por a wordo envolvi den dje, pasobra e no ta toca un asegurado di AZV.
Loke si ta kere cu como AZV ta sali hopi na cla awor aki ta e importancia cu ta keda den un seguro di biahe. Manera cu por a tuma nota, por a mira cu e personanan aki a tuma un biahe riba un crucero. E idea tabata pa pasa probablemente dushi. Loke hopi di nos ta pensa ora cu nos ta boek un vakantie, cu nos kier pasa bon. Pero lamentablemente, manera cu AZV por a tuma nota, no tabata tin un seguro di biahe. Pa AZV loke ta importante, ta pa trece esaki como un ehempel acerca, na unda cu tur por tuma nota di dje.
Ta bolbe bisa cu ta hopi lamentabel, pero un seguro di biahe por a evita hopi lamento of hopi gasto inecesariamente halto cu lo bin awor aki cu cuido medico, cu e mucha ta bay tin mester.
Como AZV ta kere cu ta importante pa duna un mensahe cu esaki, door di bisa tur asegurado y pueblo en general na Aruba, pa por fabor tuma nota un biaha mas di e importancia di un seguro di biahe. Ta keda ripiti como AZV pasobra ta haya importante pa tur hende sa cu bo AZV ta valido na Aruba y na momento cu bo ta bay den exterior, mester cumpra un seguro di biahe. E ehempel aki ta uno na unda cu bo ta wak cu e no ta solamente na Aruba e ta eigenlijk un campaña di mercadeo unda hopi compania di seguro ta keda concientisa clientenan di e importancia di un seguro di biahe, siendo cu e ta mundialmente. Bo ta wak cu den e caso aki por a compronde cu e famia aki ta un famia di Puerto Rico, e ora eynan por mira toch cu asina mes nos cu ta un isla chikito cu kisas e pensamento ta cu ta lubida of no ta corda, ta mira cu den otro paisnan grandi tambe tin ora nos hendenan kisas a lubida of nan no tabata na altura di dje.
Pero como AZV e mensahe, a base di loke a sosode, ta un biaha mas pa nos tur por fabor corda. Periodo di vakantie grandi a pasa, pero toch tin hende gusta haci uso di October y December pa bay cu vakantie, vooral mayornan cu kier bay cu nan yiunan di biahe, ta importante pa cumpra un seguro di biahe.
A wordo acerca
Tchong a splica cu no specificamente nan a wordo acerca pa e caso aki. Nan a wordo yama si. AZV tin diferente peticion pa cuido medico den exterior, cu semanalmente ta wordo evalua door di nan departamento medico y un comision special pa esey. Loke a sosode si ta cu dentro di un di e yamadanan aki, un specialista a confirma cu nan tabata bezig, tratando un caso hopi serio na unda ya caba nan tabata sa si cu tabata un caso poco particular, pasobra a conclui na e momento ey caba, cu e no tabata un asegurado di AZV. Pero mas ainda cu no tabata trata di personanan cu tin un seguro, en e caso aki un seguro medico of un seguro di biahe. Por bisa cu basta lihe, na momento cu ya caba e accidente a tuma luga y despues cu e mucha a wordo interna na hospital, por a tuma nota si di loke tabata e sucedido lamentabel aki. Pero desde un principio caba tabata conoci tambe pa e specialistanan cu a atende e mucha, cu e no tabata un caso directamente cu ta cay bao di AZV.
Si tabata asina cu tin biaha ta sosode cu AZV por wordo acerca por ehempel pa intermedia ora mester di ayudo por ehempel di contactonan den exterior. Pero den e caso specificao aki esey no a pasa. Den e situacion ya e specialistanan mes a cuminsa cana un otro caminda pa busc e ayudo, segun Tchong.
