Ralph Maduro, director (stroman) di Power FM ta sigui deteni, asina Ministerio Publico a confirma awe merdia. Mañan e ta mira un Hues-Comisario pa dicidi riba su status, sea ta prolonga of ta lag’e den libertad. Ann Angela, vocero di Ministerio Publico a sigura cu ta sospecha Maduro di maltrato y destruccion.
Ayera tardi a tuma luga un candela na cas di ex Minister Otmar Oduber na Pavia 123. Pafo e lider di POR a purba intimida e periodista Nelson Andrade y ora cu su amigo-socio Ralph Maduro a yega cerca, e situacion a bay for di man. A agredi e periodista y Maduro a kibra su celular.
Un rato despues Polis a detene Ralph Maduro na e sitio mes.
Sub Fiscal a ordena su encarcelacion, mientras cu Nelson Andrade mas laat a entrega un keho oficial na recherche di Oranjestad. E realidad si ta cu a keha Ralph Maduro y Otmar Oduber pa maltrato, pero Fiscal a opta pa persigui Ralph Maduro so y no a duna ordo pa detencion di ex-Minister Otmar Oduber.
