Awe tardi un sucedido na Colegio Arubano a escala, aki a schors e rector di e scol ya caba menciona. E situacion na Colegio Arubano pa basta tempo ta tenso. E relacion die Directiva di Colegio Arubano cu e docentenan no ta na un manera sano. E base di confiansa cu mester tin entre e Directiva y personal no tey y awe tardi e situacion a sali fo’i man. E Presidente di e Directiva, den persona di Ernesto Rosenstand, a haya ta bon pa schors e Rector, Tim Croes, sin cu tin un motibo valido.
E docentenan ta hopi disgusta cu e situacion cu ta reina na Colegio Arubano y ta desaproba tal actitud di e presidente y ta duna nan sosten na e rector. E consecuencia di e sucedido a resulta cu gran mayoria di e docentenan a dicidi cu mañan, diaranson 19 di januari 2022, lo no duna les na e alumnonan.
Nos ta lamenta cu e situacion mester a yega asina leu, pero mirando cu pa basta tempo no ta mira ningun mehoracion e docentenan ta sinti nan mes obliga pa tuma tal decision. Directiva di SIMAR, e Sindicato di Maestro di Aruba, ta na altura die sucedido y ta para pa e interes di su miembronan cu ta labora den sector di enseñansa. Nos ta spera cu den tempo rapido por bin un solucion cu ta trece trankilidad pa asina por minimalisa e daño cu esaki por trece pa enseñansa na Colegio Arubano.
