Procesonan hudicial contra periodistanan y medionan di comunicacion ta deteriora e libertad di prensa y expresion, esaki tabata e acuerdo di Chapultepec y awo ta base di un estudio di e Asociacion Interamericano di Prensa (SIP), realisa den 22 pais di e region entre mei 2019 y april di e aña aki.
E investigacion, realisa pa e Universidad Catolico Andres Bello, a analisa e comportacion di e
ambiente institucional y a haya cu varios proceso hudicial contra periodistanan a atenta contra libertad di prensa y expresion.
Na Peru, periodistanan a enfrenta casonan pa hopi tempo largo como un forma di presion. Na Nicaragua, e rason principal di e falta di libertad di expresion ta e control absoluto di gobierno riba e podernan Hudicial y Legislativo. Na Argentina, e gobierno a impulsa un proyecto di reforma cu ta un atentado contra independencia di e poder hudicial.
Brasil, di un otro banda, e accion institucional di e podernan hudicial y parlamento ta proporciona “checks and balances” riba e comportacion di gobierno, na defensa di libertad di expresion.
E organisacion “Inter American Press Association” of na Spaño yama “Sociedad Inter Americana de Prensa” ta existi desde aña 1943 y ta representa mayoria medionan di comunicacion den Norte America, Sur America y Caribe, cu mas di 1300 miembro y cu su base situa na Miami. Headines Group, cas editorial di e portal di noticia 24ora.com ta un miembro activo di e organisacion internacional aki.
