Poco prome cu merdia, miembronan di sindicato VWI cu ta coresponde na personal di WEB Aruba N.V. a tene un accion caminda a pone trabou abou y bay para dilanti di e sede di e compania di produccion di awa y electricidad na Balashi. Presente tabata, ademas di e directiva, representantenan di otro sindicatonan manera Simar, SADA y OPPA. Manera ta conoci, e gran mayoria di sindicato na Aruba ta activo awe pa un accion den cual ta rechasa e continuacion di reduccion di salario cu 12.6%. Di parti di VWI ya caba tabatin e accion di awemainta programa y a bay door cu esaki.
Presidente, Richard Frank a duna un splicacion na e miembronan para pafo den e accion di kico tur a bin ta haci desde cu e medida di solidaridad a drenta na vigo y kico ta e ultimo desaroyo. VWI ta sostene e accion masal di awetardi y ta conta cu e aprobacion di nan miembresia pa cu esaki. Frank a duna di conoce cu nan no ta na altura di ningun bonus, manera supuestamente e companianan di utilidad di gobierno lo ricibi. Pesey mes ta bay full dilanti cu nan plannan, tanto den Corte como riba caya, pa opone e reduccion di 12.6% di e salario di nan miembronan; pio ainda, sin cu ta duna cuenta di unda e placa aki ta bay.
Pa mas informacion, lesa e edicion di TREMPAN.
