Despues di a sinta pa varios luna na mesa, por fin NV Elmar y sindicato STA a yega na otro y diabierna a firma un acuerdo di principio pa finalisa e capitulo aki.
Segun presidente di STA, Diego de Cuba, mustrando e democracia cu STA ta practica semper, a reuni cu su miembronan pa laga nan vota pa e acuerdo aki.
Tin di bisa cu durante e votacion aki, e mayoria absoluto (2/3 parti) a bay na fabor di e Vaststellingsovereenkomst (VSO), loke a duna e sindicato STA hunto cu e delegadonan e derecho pa firma, hunto cu gerencia di NV Elmar diabierna mainta.
Di parti di mayoria di e trahadonan, ta contento cu esey, mirando e hecho cu tin otro compania estatal di utilidad, cu a yega na un areglo cu esaki pa nan empleadonan y ta contento toch cu di parti di gerencia di NV Elmar nan a compronde e mensahe cu a trece dilanti di parti di e miembronan di STA.
Segun de Cuba, loke ta bay resta pa haci ta prepara pa sigui negosha e contracto colectivo na comienso di otro aña. A agrega cu mester cuminsa negosha e CAO den luna di maart 2022. Pero firmando e acuerdo aki, ta kere cu e empleadonan di NV Elmar por hala un rosea e fin di aña aki y comienso di otro aña tambe.
STA ta sumamente contento cu el a finalisa asina aki. Tabatin varios accion di protesta durante e ultimo lunanan y sindicato STA semper ta boga pa paz laboral.
Di parti di NV Elmar, Anthony Irausquin, director di e compania di utilidad, a firma basta lihe ya cu a trata tur punto di e acuerdo anteriormente. Esey t’e motibo tambe cu a traha un cita delanta pa asina firma e acuerdo diabierna mainta, cu a bay den un bon ambiente.
Awo tin tempo pa por sigui traha y otro aña ta bay cuminsa cu tratamento di e CAO nobo.
Elmar ta keda un compania vital y cu ta exigi hopi inversion e añanan cu ta bin. Mester haci hopi mantencion, pa tanto e red y tur edificio cu tin rond di Aruba. Mester keda negosha pa asina keda na otro. No djis aproba algo. Semper tin proceso cu sa tarda. Den e caso aki loke cu ta hunga un rol hopi grandi ta e 12.6%. Esey te awo no por haci nada cu ne. Ta un instruccion cu tin di parti di e dunado di trabao, pero tambe e doñonan cu ta gobierno, cu ta algo cu tin cumpli cu ne. Awo hunto cu sindicato a bay mira ki otro forma cu por a logra pa yuda e empleadonan y alabes pa tin paz laboral. Esey ta loke a bin ta andando den e ultimo dos pa tres luna cu a haci un cambio den loke ta e proposicionnan. Esey diabierna finalmente a yega na otro.
Pa un cobertura mas amplio lesa e edicion di TREMPAN di mañan.
