Sindicato Federacion di Trahadonan di Aruba (FTA) a bira e sindicato cu ta representa e trahadonan di aeropuerto. Nan a gana e referendum y awo nan ta na mesa cu gerencia.
Hubert Dirksz, presidente di FTA a splica cu na mesa actualmente nan ta den negociacion pa un CAO nobo pa e trahadonan general, cu ta basta avansa caba. E parti no financiero ta practicamente cla y aworaki ta atendiendo e aspecto financiero.
Ta kere cu pronto lo tin un CAO y cu aprobacion di e trahadonan lo yega na firma esaki basta lihe. Loke tin si como novedad ta cu di parti di sindicato STA, a haci un peticion na mediador di gobierno pa tene referendum pa algun di e departamentonan, despues cu el a perde.
Door di e maneho cu tin di mediador, despues di seis luna un sindicato por bolbe haci un peticion pa un referendum si e tin mayoria. Den e caso aki e no tin e mayoria pa e empresa completo. Pero si pa cierto departamentonan. E referendum lo bay tuma luga y FTA lo participa na esaki tambe.
E ora lo bay wak si en berdad si tin necesidad pa negosha CAO pa e departamentonan, apart di loke cu tin. E problema ta cu FTA ta negoshando un CAO aworaki pa henter e empresa. Na momento cu tin un CAO valido, mester warda esaki caba pa por atende pa un otro CAO. Esey ta e situacion cu ta bay enfrenta probablemente. Tambe den AAA, e IAOersnan a bira miembro di FTA y ta atendiendo nan. A haci un peticion pa referendum. Tin un mayoria basta comodo. Na mesa ta discutiendo pa enbes di bay referendum pa firma un protocol. Tin un reunion pa caba cu esaki, firma un protocol y tambe presenta un proposicion pa CAO y negosha esaki segun Dirksz.
