Un reunion cu basta anticipacion, esun di Sindicato di Polis (SPA) y Minister di Husticia Rocco Tjon, a tuma luga diabierna mainta trempan den Cocolishi. Varios punto di importancia riba mesa, cu pa e sindicato tabatin mester di atencion urgente di e minister encarga.
Vice presidente di Sindicato di Polis Rolando Maduro , a duna su prome impresion di con e reunion aki a bay. Locual a resalta na prome instante ta un minister friu, keto y indicando cu e no tin nada personal cu ningun hende di sindicato, particularmente cu Maduro. Esaki ta conta di parti Maduro mescos.
Den bista di Maduro, e mandatario tin su posicion politico y su votadonan cu e tin cu zorg pa nan mientras di parti sindicato, ta su miembronan polis cu ta su achterban cu e tin cu atende cu nan.
E reunion a habri riba un tono critico, duro y directo pa asina busca claridad riba e puntonan di importancia cu e sindicato a trece dilanti. E tabata bon cla cu no a bin pa scucha storia pero contesta concreto riba fecha, ora y luga ta con ta bay atende cu e diferente situacionnan di preocupacion. Ta locual cu a logra haya tambe.
Prome punto tabata edificio
Fecha stipula pa esaki ta dia 10 di februari, caminda lo yega na un decision riba e warda di polis Playa y na unda lo muda esaki. Ta premira e ora cu pronto colega y comunidad por mira cu e warda di polis Playa lo muda pa un localidad nobo. Segun informacion cu Maduro a ricibi durante reunion a indica cu tabatin por lo menos seis pa shete opcion y na final a keda cu dos opcion pa un warda nobo.
Edificio di Bon Bini Bazaar den Caya Grandi y edificio situa na Paardenbaai, ta e dos opcionnan cu a keda riba mesa y for di akinan lo tuma un decision final. Tin di menciona cu e edificio den Caya Grandi lo ta uno ideal pero mirando cu e tin algun aña para, lo por costa basta placa pa optimalisa esaki.
Ta resta e ora edificio di Paardenbaai, cu muy probablemente lo ta esun cu lo bira e edificio nobo pa warda di polis Playa. Pa Maduro esaki lo bira un logra grandi sindical y no di gobierno como cu gobierno a deha masha tempo caba riba e situacion aki. Door di presion di cada miembro tambe e reaccion positivo cu a ricibi di e pueblo, a duna fruto y gobierno a haci su trabou manera mester ta.
Pa locual ta un posibilidad pa drecha e edificio actual, esaki no lo ta factibel. Tin di mira si lo tene tur departamento hunto den e mudamento aki of si lo opta pa busca otro caminda pa ubica esakinan. A duna un sugerencia si, pa miho separa algun departamento cu ta atende cu asunto delicado y lo ta miho cu nan lo ta ubica na un otro sitio mas priva. Riba e punto aki a mira cu mas sigur lo cumpli cu e peticion di sindicato riba esaki.
Otro punto tabata klas di polis
Pa 2023 tampoco lo tin un klas di polis. Segun minister di husticia, lo a busca forma pa yega Hulanda y asina convence minister encarga cu husticia na Hulanda cu ta di sumo importancia pa aloca fondo pa un of mas klas di polis pa e aña venidero pero pa locual ta trata e aña aki mes, esaki no lo ta e caso mas. No lo tin klas mas pa e aña aki.
Na e momento aki ta papia di un total di 200 polis cu ta di menos den Cuerpo Policial di Aruba, cu ta nifica un 30% menos di locual tin mester di dje como minimo. Ta trece un preocupacion grandi como cu pa cada aña venidero lo tin entre 50 pa 75 polis menos, cual ta esunnan bahando cu pensioen.
Material pa polis
Ta fresco den mente ainda na momento cu Rocco Tjon tabata den posicion di parlamentario, dia tres di december 2020 den un conferencia di prensa dilanti parlamento a expresa, di a exigi parlamento cu lo mester bin tur material pa polis, awe den posicion di minister y tres aña despues .. nada!
Durante reunion di diabierna a bolbe priminti cu e bulletproof vest lo yega pronto. Na luna di januari a gobierno a haci pago y den aproximadamente seis siman lo ricibi esakinan. A pasa tanto aña y apenas awo, comienso di e aña aki, a haci pago pa asina por entrega material na polis. Maduro a puntra ta kico e gobierno aki ta bezig cu ne.
Na final di tur cos, Rocco Tjon lo bay cas, of un di su casnan bek mientras e polisnan tin cu sigui brinda servicio y traha 24/7 na bienestar di e isla aki.
