Turista cu auto di huur a pasa den susto ora un otro auto a lora su dilanti y ranca su bumper bay cu ne. Esaki a tuma luga riba L.G.Smith Boulevard na e curada di Palm Beach Plaza.
Tabata aproximadamente 1:30 pm ora cu a bin topa cu e vehiculo aki para bandi caminda cu basta daño material na e parti dilanti di e Mercedes GLS 550 4Matic color preto. E otro chauffeur cu tabata envolvi a bandona e sitio. Prome cu el a haci esey, a duna e persona su dato y number di contacto pero a bis’e cu e tin muchu pura pa sinta warda esunnan encarga presenta na sitio.
Taxista den area a ofrece ayudo y asina a tuma contacto cu polis, cu a presenta y un rato despues a sigui nan caminda. Compania di car rental tambe a presenta y a encarga nan mes di piki locual tabatin riba caminda benta, entre otro e bumper. Mientrastanto e taxista, amablemente, a hiba e turista y e pasaheronan pa nan destinacion.
