Durante e simposio “Embehece Sin Tabu”, organisa pa Directie Ouderenzaken, Minister di Salud Publico, drs. Mervin Wyatt-Ras, a destaca e necesidad pa fortifica e cuido pa adulto mayor, amplia sosten na cas y aumenta prevencion di e malesanan cronico y deterioro cognitivo.
Minister di Salud Publico, drs. Mervin Wyatt-Ras, a destaca e necesidad pa Aruba prepara su mes miho p’e aumento den e cantidad di adulto mayor y p’e reto creciente di demencia y Alzheimer. El a expresa esaki durante e simposio “Embehece Sin Tabu”, organisa pa Directie Ouderenzaken, unda profesional di diferente organisacion a comparti informacion riba e topiconan relaciona cu embehecimento
Segun e minister, e simposio a trata entre otro deterioro cognitivo, demencia, Alzheimer, sexualidad, salud mental y e decisionnan na final di bida. Wyatt-Ras a menciona cu, segun informacion presenta durante un di e sesionnan, na Centro di Memoria ta acudi aproximadamente 212 persona, di cual alrededor di 121 ta identifica cu Alzheimer of demencia.
E minister a indica cu e cifranan aki ta mustra e importancia di prepara e sistema di cuido pa atende e necesidadnan di un poblacion cu ta embeheciendo. Gobierno ta traha riba diferente medida pa fortalece e sosten pa adulto mayor, incluyendo cuido na cas y cooperacion cu Wit Gele Kruis. Tambe tin facilidadnan di cuido, incluyendo e tres facilidadnan grandi di SABA, cu ta forma parti di e sosten disponibel.
Un otro iniciativa cu Wyatt-Ras a menciona ta e preparacion di e Wet Langdurige Zorg. E ley lo busca facilita sosten financiero p’e personanan cu tin necesidad di cuido durante un periodo largo, incluyendo hende cu no tin un red familiar amplio pa yuda nan. Segun e minister, e meta ta p’e ley por avasa den proceso legal y haya e consehonan necesario, cu e speransa cu esaki por tuma luga den luna di november.
Wyatt-Ras a subraya tambe cu e enfoke no mester ta solamente riba cuido, sino riba prevencion. El a menciona estilo di bida, alimentacion poco saludabel, consumo di alcohol y huma como factor cu por afecta salud. Den colaboracion cu Directie Volksgezondheid, gobierno ta traha riba programa pa combati obesidad, incluyendo e Gecombineerde Leefstijlinterventie (GLI), cu ta ofrece informacion y guia pa hende cu kier mehora nan estilo di bida.
Segun e minister, prevencion mester cuminsa desde edad hubenil pa reduci e riesgo di e malesanan cronico y contribui na un poblacion mas saludabel. El a agrega cu e reto di embehecimento ta pidi cooperacion entre gobierno, profesional, organisacion y famia, pa persona por keda na cas mas tanto posibel, cu e sosten necesario.
Un simposio pa kibra tabu
Damara Rasmijn, relacionista publico di Directie Ouderenzaken, a splica cu e simposio ta yama “Embehece Sin Tabu” pasobra e meta tabata habri conversacion riba cinco tema cu den comunidad hopi biaha ta considera tabu: sexualidad, meditacion, salud mental, deterioro cognitivo y e decisionnan na final di bida.
Den diferente sala, entre cuater y cinco profesional di diferente organisacion a brinda informacion y contesta pregunta di participante. Rasmijn a indica cu e actividad a resulta interactivo, permitiendo publico cambia di sala segun nan interes y participa activamente den e conversacion.
A scoge e temanan despues di diferente charla den bario, unda adulto mayor a comparti cua informacion nan tabata falta. Mas di 20 organisacion a contribui n’e simposio. Directie Ouderenzaken lo evalua e interes registra pa determina si e siguiente edicion lo sigui cu e mesun temanan of amplia e programa.
Tanto Wyatt-Ras como Rasmijn a destaca e importancia di sigui informa e comunidad y trata embehecimento cu mas apertura, respet y dignidad.
