No por warda te ora e situacion bay completamente fo’i man pa bin cu un plan. Maestronan di scol ta boga pa Minister dr. Rudy Lampe activa pa caba y anuncia su plan di maneho memey di e circunstancianan nobo mara na e pandemia y presencia di Covid-19 den enseñansa. Varios scol ta atendiendo cu scenarionan abnormal di cantidad di maestro y alumnonan isola na cas of den cuarentena. Tur esaki mientras cu tin obligacion cu Schoolexamens y CP week y otro deadlinenan den enseñansa, tanto pa e studiante como e maestro.
SIMAR a yama un rueda di prensa pa expresa nan preocupacion di e situacion actual den enseñansa relaciona cu Covid-19. Nan a tuma nota di e desaroyo di cantidad di casonan positivo di Covud-19, por ehempel awor cu e propio director di hospital mes a sali y bisa cu capacidad di cama na ICU ta yegando su maximo. Tambe nos sa awo cu e cantidad di pashentnan hospitalisa p’e virus ta subiendo. A surpasa 600 caso positivo y e sindicato a haya hopi pregunta di diferente persona cu ta traha den enseñansa. E maestronan a trece nan preocupacion dilanti y kier sa kico ta bay pasa.
P’e sindicato, e bienestar, salud y siguridad di esunnan cu ta traha den enseñansa ta na prome luga. A recorda con e casonan di contagio a subi aña pasa, e tabatin influencia riba e manera con enseñansa a continua. Mirando e desaroyo di e cantidad di pashent di COVID, ta boga na gobierno si bin cu un plan pa enseñansa, Josephine Albertus, presidente di SIMAR, a expresa.
E plan cu gobierno of Crisis Team bini cu ne, tin di tene cuenta riba e importancia di presion pa finalisa e curiculo no bira mucho pisa pa maestronan. E sindicato ta boga pa bin c’un plan cu ta trece claridad y trankilidad pa enseñansa.
SIMAR ta sali pa yega na e veld completo di enseñansa y lo sostene nan, pero tambe ta monitorea e situacion. Ta apela na gobierno pa bin c’un maneho pa trece trankilidad y corda riba peso di trabou pa tanto maestro como alumno y alabes e mayor. Segun Albertus, tur ta afecta door di e pandemia.
