Gina Nuboer, un laico, pa añanan largo ta organisa e procesion den cayanan di Dakota riba Bierna Santo. E ta un evento religioso cu semper a hala atencion di hopi hende. Aña pasa e no a sigui y lamentablemente e aña’ki tampoco. Esaki debi na e.o. na e decision di Obispado di Willemstad, bou di cual Aruba ta cay, cu a dicidi pa pone un paro na proceso servicionan den misa. Esaki debi na aumento den casonan di COVID-19.
Nuboer a bisa cu e ta respeta e decision di Obispado. El a recorda con den tempo di guera no tin misa y awor cu mundo ta den guera cu un enemigo invisibel. Pa cual ta miho keda cas y resa hunto den famia y sigui fortifica e fe.
Despues di e decision tuma door di Obispado, hopi a puntra si no ta na su luga pa Aruba tin su mesun Obispo. Pa Gina Nuboer, esaki no ta mal idea. Kisas e ta algo cu por tuma luga den futuro y hasta e por ta un Arubiano. Si mira cu Aruba ta un pais, e no ta mira motibo pakico Vaticano lo por tin un motibo pa ta contra un Obispado. “Mi no ta mira algo malo den esaki.”
Aruba y mundo ta biba den un era hopi moderno, unda e sistema digital ta hunga un rol importante. Tin hopi motibo pakico un misa online ta atractivo. Asina por ehempel tin hopi hende grandi cu no por yega misa, sea door di nan condicion of pa falta di transporte. Mescos cu ta reuni den misa y sigui’e digitalmente den famia na cas.
El a haci un apelacion na tur pa pone bista riba e siman santo cu ta na caminda. Si no tin misa, e ta pidi famianan pa sinta hunto y reflexiona riba e pasion di Cristo (otro siman diabierna, 2 di april).
