Recientemte a tuma luga un conferencia di prensa di e fraccion MEP, ey ta caminda cu e lider di fraccion, drs. Shailiny Tromp-Lee a hiba palabra.
E parlamentario a enfoca riba e reunion cu lo tuma luga awe den parlamento, caminda cu prome minister di Aruba, mr. Evelyn Wever-Croes lo t’ey den sala di parlamento pa duna claridad riba e refinanciamento di e debe cu el a firma durante pandemia cu Hulanda. Tambe e prome mandatario lo duna informacion unda nan ta para como gobierno relaciona cu e Rijkswet Financieel Toezicht Aruba.
Drs. Shailiny Tromp-Lee di MEP a indica durante e conferencia cu e ta sinti cu Hulanda ta trata Aruba otro compara con a trata Corsou y St. Maarten. Segun Lee, ora cu Corsou y St. Maarten a haya supervision financiero, nan a haya diferente beneficio tambe, entre otro likidez total di nan debe y ora di fianancia, por fia na e interes mas abou cu ta posibel.
Lee ta cuestiona cu Aruba den e proceso no tabatin e mesun suerte cu Corsou y St. Maarten. Aruba no ta nenga di paga, sino simplemente ta pidi trato igual. Hasta ta sinti cu Hulanda ta haci negoshi riba cabes di Aruba. Desde cu Aruba a bira autonomo, semper pais Aruba a cumpli cu su debenan of a refinancia na tempo. E ta conoci cu Aruba ta un pagado!
