Actividad manera esun di fin di siman tabata haci falta y ta locual e promotor a enfoca riba dje. Tarrik Ras, encarga cu e Teens Event, a conta cu en berdad hubentud di Aruba a reacciona di biaha na momento cu a anuncia e evento.
Ta masha poco of practicamente nada ta locual cu ta organisa pa esunnan di edad mas hoben, haya pa bay. Algo sano, den un orario mas trempan, sin alcohol pero cu e mes un ambiente cu cualkier otro fiesta.
Tarrik y un team a forma e organisacion y asina prepara y promociona evento netamente dirigi na nos hubentud. Tin di menciona, cu ta di dos edicion di Back to School event y ambos tabata un exito rotundo y ambos a sold out den fraccion di algun dia.
Cu cada evento ta busca pa surpasa e prome, tanto den presentacion como e line-up. Ta busca e miho artista/dj di momento pa asina buta drama y anima e publico hoben .
Pa locual ta trata e orario, e ta un adaptacion tanto pa e hobennan mes pero tambe pa e mayornan. Orario ta uno estricto y si no yega na ora, e yiu tin chens di perde tur e ambiente cu tin y cu ta cuminsa na tempo. Esaki ta conta pa e orario di caba e actividad tambe, pa 12:00 am en punto ta cende luz a termina cu e fiesta.
Como promotor, Tarrik ta tuma e encargo y siguridad di e publico hoben hopi na serio. A sigura e mayornan cu no tin alcohol na e fiesta y como tal e ta cumpli cu esaki cabalmente. Ta busca pa surti e bar si, pero cu refresco, awa, juice enz. A bay asina leu y asina serio den e esfuerso pa no promove bebida alcoholico, cu ta zorg pa paga tur luz di propaganda cu tin den e establecimento pa evita cualkier mal comprondemento.
Algo cu tambe nan ta sostene, ta e prohibicion di vaping, na ningun actividad cu nan ta promove pa teens no lo acepta vaping y e ta prohibi pa drenta e localidad cu ne. Tur esaki y e bon comportacion di e hobennan cu ta participa na e evento aki, a haci cu a cuminsa gana e confiansa di e mayornan y ta gradici e confiansa aki.
Cu e prome edicion y ta di compronde, cu algun mayor tabata tin duda, pero mirando e exito cu ambos edicion tin tras di lomba, ta spera cu e mayornan por ta trankil y por laga nan yiunan bin gosa di e siguiente eventonan na caminda.
Tarrik Ras ta enfatisa cu comportacion ta locual cu ta e exito y si cada hoben sigui comporta nan mes, mas evento lo sigui bin pa nan por gosa sanamente.
A haya oportunidad tambe pa combersa cu Jonathan ‘Cloutrich’ Richardson, cu ta un di e artistanan cu a presenta e anochi aki. Ambiente tabata total, a sinti cu e publico a biba cu nan cancionnan. Den su opinion e cancion cu mas duro a dal tabata 24/7 cu nan a gusta masha hopi mes.
Cloutrich ta relativamente nobo den farandula, e tin cuater aña como cantante pero activo e ultimo aña aki un poco mas serio. Expectativa tabata halto y e publico teen a sa di gosa y demostra cu ta nan ta pone ambiente. Un energia haltisimo henter anochi cu a haci esaki un exito rotundo.
