Ta incomprendibel cu pa asunto nacional asina importante, pa un momento, oposicion no por pone nan pechi partidista y personal un banda y bisti esun di nan pais.
Aruba ta den recuperacion berdad. E cifranan di economic outlook di Departamento di Asuntonan Economico ta indica cu na 2020 Aruba a conoce un recesion economico di 24.5% y cu na 2021 nos tabatin un crecemento economico di 16.4% y na 2022 di 10%.
P’e aña aki ta premira un stabilisacion di nos crecemento economico di 4.5%. E cifranan aki ta indica cu nos a conoce un recuperacion 101.1% compara cu aña 2019. Esaki sigur ta un logro significante pa nos pais. Anto asina corto despues di e pandemia. Gran parti di esaki ta danki na nos turismo cu ta sigui crece. E recuperacion pa loke ta trata e cantidad di turista ta 116% compara cu 2019 y e entradanan for di turismo (‘tourism receipts’) ta 118% mas cu na aña 2019. Cual por cierto tabata un aña record pa nos turismo.
No obstante e desaroyonan positivo aki, Aruba tin un preocuacion hopi grandi y esaki ta nos debenan y e interes cu nos mester paga mara n’esakinan. Gran parti di e debenan aki ta crea bou di Gabinete Mike Eman cu no solamente a redobla e debe nacional den 8 aña di tempo, pero na mes momento no a percura pa indica of crea e manera con nos tin cu bay paga pa esakinan. Un iresponsabilidad di marca mayor. Crea un Mega Debe y manda pueblo bay hoga y awe kier hunga manera YO NO FUI.
Banda di esaki nos tin e debe crea durante di pandemia pa por a brinda alivio financiero y sosten na nos pueblo y comercio. Placa cu a presta fo’i Hulanda y cu awo nos mester bay paga bek. Gobierno mester percura pa crea e manera con nos ta genera e entradanan necesario pa cubri pago y interes di e debenan.
Un manera pa genera mas entrada tabata aumento di BBO cu 1% na comienso di aña pero tambe a presupuesta extra entrada cu lo keda genera mediante BBO na frontera. E ultimo aki a bin na momento cu Gobierno a dicidi, a base di resultado di un investigacion encuanto di e impacto inflatorio entre un BTW/BBO na frontera y a base di peticion di stakeholders pa introduci BBO na frontera y no un BTW. Ta yen di punto di discucion tabatin pero na final Gobierno a dicidi pa kies pa BBO na frontera mirando cu e impacto lo ta menos pa nos hendenan.
Ta bon pa nos tur realisa cu algo mester haci, no por otro. Momento pa paga a yega, y manera Mike Eman mes a bisa den sala di reunion di parlamento: “e lo paga p’e cu orguyo”. Awo ta e momento p’e y su partido AVP haci loke el a indica. Pero nos por a ripara cu nada no ta bon pa nan y tampoco p’e demas miembronan di oposicion.
Cu bo por tin critica, pregunta of sugerencia esey ta mas cu normal. Pero bo no por ta contra pa ta contra, malinforma pueblo, instiga inecesariamente, purba di crea caos, sin ni un dia brinda pueblo BO solucion.
Kico y con nan lo a atende e ora cu e situacion. A bira ora pa un y tur riba e pais aki cuminsa bisti e pechi di Aruba y ban traha na bienestar general. Esaki pa e beneficio di nos pueblo na e momentonan aki y sigur pa nos futuro generacion.
