Durante e conferencia di prensa di fraccion di MEP, parlamentario Setty Christiaans-
Yarzagaray a elabora riba e topico SDG (Sustainable Development Goals) cu ta parti di e
metanan di Nacionnan Uni, unda mas cu 150 pais a firma un acuerdo pa bin cu un set di 17
meta y cu tin e proposito pa logra un desaroyo sostenibel na 2030.
Conferencia di ECLAC
Sra. Christiaans-Yarzagaray a trece padilanti cu e siman aki mes tin e conferencia di ECLAC
(Economic Commission for Latin America) organisa na Aruba, caminda e organisacion aki ta
asisti Aruba y tin e obhetivo pa pone nos pais den e bon direccion y p’asina nos por logra
cumpli cu e metanan di Nacionnan Uni. Algun di e metanan aki ta cu lo no mester existi
pobresa ni hamber mas den un pais y tambe cu e calidad di bida di e ser humano mester
wordo bon sirbi. Pa un pais esaki ta e conexion cu mester existi entre e ser humano,
naturaleza y e parti economico. Tur e metanan aki ta cuadra cu e filosofia di MEP na unda cu
nos partido tambe ta pone e hende central.
Diversificacion di economia
Sra. Christiaans-Yarzagaray kier wak con nos como pais por aporta pa logra e metanan aki ya
cu nan ta cuadra cu nos obhetivonan. Tambe el a trece padilanti e situacion cu a surgi
recientemente entre Aruba y Venezuela, caminda nos pais ta ser afecta tanto riba e parti
turistico como economico. Pero sra. Christiaans-Yarzagaray ta mira henter e parti aki tambe
como un oportunidad, ya cu esaki lo conduci na diversificacion di nos economia y ta stimula
creacion di mas industrianan chikito. Pa duna ehempel, e sector di agricultura, caminda cu un
escases na fruta y berdura ta un estimulo pa nos mes produci e productonan aki. Tur esaki ta parti di e metanan di SDG caminda nan ta purba stimula paisnan pa produci nan propio
cuminda. Pues un oportunidad unico ta yegando na nos tambe pa ban cuminsa stimula, crea,
diversifica y fortifica nos economia.
Coleccion di datonan
Finalmente el a trece padilanti cu e reunion di ECLAC di e siman aki ta mas tanto enfoca riba
datonan, esta con e coleccion y sistema di datonan ta na Aruba. Nacionnan Uni ta pensa cu
mester por controla e coleccion di datonan y p’asina tin un bista si tur pais ta canando den e
mesun direccion. Ta e intencion di sra. Christiaans-Yarzagaray pa bin cu un comision
extraordinario den parlamento pa cu e tema aki. Lo duna e atencion necesario y aporta mas
tanto posibel pa cumpli cu e metanan aki tambe.
