Setar a presenta un projecto nobo diasabra mainta ‘Tribute to 70 years of Carnaval Music.’ Tur aña e compania estatal di comunicacion ta contribui grandemente na carnaval di Aruba, pero awor cu ta carnaval 70 cual ta algo otro den sentido cu e ta pone bo pensa kico tur a pasa durante e decadanan aki. Setar a bin cu e idea pa rindi homenahe na 25 cancion clasico di carnaval di Aruba den un evento cu lo tuma luga den januari 2024.
“Nos a pensa cu awor a yega ora pa nos duna homenahe na 25 cantica di carnaval, anto nos a pone 25 – y bo por pone cien mas – pero bo tin cu kies 25 cu den nos bista a cambia cada rato ki tipo di musica tabata tin den carnaval,” segun Roland Croes, director di Setar. E direccion musical pa e proyecto lo ta den man di musico Carlos Bislip.
“Pa mi esaki ta un dream come true,” Bislip a expresa. Apesar cu e musico den su trayectorio y carera musical no tabata mucho ocupa den carnaval, prome cu esey el a aporta y contribui hopi, y te dia di awe tambe cu musica den carnaval semper den su curason. P’e ta un gran honor pa ta encarga cu esaki trahando cu henter e motor grandi di hendenan cu ta envolvi.
Pa loke ta bay ta e anochi mes di e evento, e ta bay ta un evento Gala, dus lo ta algo formal anto e fecha lo ta riba 5 di januari, na Renaissance Convention Center desde 8:30pm. Portanan lo habri 7’or y tickets ta obtenibel via pay.aw, cual ta e unico caminda cu por haya tickets awor, y benta a cuminsa diasabra 5’or di atardi. Tur hende lo bin wak e orkesta Big Band lidera pa Carlos Bislip, deleitando e publico cu e miho canticanan di carnaval cu a resona durante ultimo 70 aña.
Entrada lo ta $100 y cuponan ta limita pa e anochi aki mirando cu Renaissance Convention ta e lugar mas grandi cu nan por a haya pa organisa esaki. Asina mes e no lo ta bay ta suficiente mirando e interes grandi cu tin.
