Riba 11/11 polis tabata activo cu difirente control den trafico. Tabata na Paradera, pa ta exacto den Bloemond, ora cu polis a para un auto marca Honda modelo Fit. Durante e control, polis a nota cu e chauffeur su dedenan tabata tembla so. Ta suficiente motibo pa sigui puntra y check mas profundo dicon e chauffeur tabata asina nervioso.
A resulta cu e no tin rijbewijs. Adicional, comosifuera poco, tambe a resulta cu e no tin permiso di estadia pa ta riba nos isla, pa cual ta hacie un persona indocumenta. Riba su mes, esey no ta un crimen, pero ta motibo suficiente pa polis bay cu ne direccion warda di polis caminda lo pas’e over pa Guarda Nos Costa kende le percura p’e proceso di deportacion.
