Minister Xiomara Maduro ta informa cu ta bay cuminsa cu un serie di programa ‘Aruba fuerte y resiliente, reactivando nos economia’ tur dialuna pa 7:30pm na TeleAruba. E programanan aki ta pa comunidad por keda na altura di e actividadnan economico cu Gobierno di Aruba por medio di Departamento di Asuntonan Economico, Comercio y Industria (DEZHI) ta fomenta pa ehecuta e maneho economico fuerte y resiliente pa Aruba.
Aruba Fuerte y Resiliente – Reactivando nos Economia
E serie di programa ‘Aruba Fuerte y Resiliente, Reactivando nos Economia’ lo inicia dialuna awo dia 2 di november. E prome topico cu lo trata ta e ‘Plan Strategico Nacional: Nos Plan, Nos Futuro’ (NSP) durante dos programa cu lo pasa na TeleAruba riba dialuna dia 2 di november y dia 9 di november. E NSP ta consisti di 9 programa di accion y un representante di cada programa lo brinda informacion tocante e trabounan realisa y e importancia di cada programa.
Durante e prome programa Minister Xiomara Maduro lo informa tocante di e NSP, sigui pa Maria Dijkhoff-Pita, director di DEZHI cu lo elabora riba e proceso y tur e trabounan haci pa yega na e NSP. Alabes den e prome programa aki tin como invitado Mari-Lou Lejeuz-Figaroa cu ta presidente di e Grupo di Trabou di Indicador, Gisberth Boekhoudt, miembro di e Grupo di Trabou di Maneho di Recursonan Natural y Jocelyne Croes cu ta Presidente di e Comision di SDGs – Metanan di Desaroyo Sostenibel – y cu tambe ta miembro di e Grupo di Trabou di ‘Aruba como modelo pa e Metanan di Desaroyo Sostenibel’. Durante di e di dos parti di e programa di NSP lo entrevista e representantenan di e cinco otro Gruponan di Trabou.
Iniciativa pa desaroyo di nos economia
E mandatario a informa cu ta haci hopi trabou pa stimula economia di Aruba. Durante di e serie di programa ‘Aruba Fuerte y Resiliente –Reactivando nos Economia,’ comunidad ta keda na altura di tur e trabounan y iniciativa den e parti di economia di nos pais. Durante e proximo simannan e programa lo tin como topico Alivio Fiscal, Sectornan Prometedo pa Diversificacion di Economia y lo continua cu otro iniciativanan cu ta tuma luga pa desaroyo di e economia di Aruba.
