E siman aki a habri cu trahadonan di Post NV den un accion pa expresa nan malcontento. E sindicato cu ta representa e trahadonan a logra sinta na mesa cu gerencia cu a trata di mustra nan cu e situacion no ta manera nan ta mira pero cu ta dispuesto pa sinta na mesa.
No solamente e forma dictatorial cu ta atende cu e trahadonan, pero tambe nan posicion huridico ta otro preocupacion. Magaly Brito, Secretario General di SEPPA, a bisa cu e asunto aki ta un tema fastioso, pasobra tin realidad di COVID-19. Pero mester admiti, e ta bisa, cu prome cu e pandemia e situacion di Post tabata delicado caba.
Den e reunion gerencia a duna nan un bista di e situacion financiero di Post pero tambe a haya un analisis di e situacion di Post ta mundialmente. Tin algun idea riba mesa pero tur esaki ta bay discuti den e reunion di otro siman, cu nan ta spera cu e minister encarga tambe lo ta presente. Sindicato lo trece poco contra proposicion pa loke ta futuro di e servicio aki pa comunidad na Aruba.
Den e situacion actual, e ta bisa, ta dificil pa papia di retiro di trahadonan, perdida di cupo di trabou. E situacion ideal lo ta pa presenta e situacion real, mira con pa yega na otro cu e meta pa tur hende mantene nan trabou. No ta un secreto, el a bisa, cu awendia ta dificil pa haya trabou. Pero perde trabou ta trece hopi problema pa e ciudadano y consecuencia cu no kier pa comunidad. Nan ta propone pa sinta na mesa na un manera habri y analisa e proposicion pa salba e servicio y trahadonan mantene nan cupo di trabou.
