Tin un preocupacion relaciona cu pensioen. SEPPA tabata hopi envolvi den salbacion di e fondonan di pensioen, ora cu gobierno a acerca e sindicato y demas instancianan. Tin intencionnan manera baha edad di pensioen, etc. Segun Magaly Brito, secretario General di e sindicato, SEPPA ta tuma nota di e intencionnan cu tin pa loke ta bahamento di edad di pensioen. Ta papia primeramente riba edad di pensioen di AOV, pero naturalmente sa cu esaki tin consecuencia of e tin efecto tambe riba edad di pensioen di ambtenaarnan.
Si scucha bon, e opinionnan cu tin bao di e mesun miembronan y tambe ta tende di e diferente empleadonan publico, ta asina cu tin un grupo cu ta contento cu e posibilidad ey y di un otro banda tin un otro grupo cu ta bisa cu ya awor aki, despues cu a haci tur areglonan te cu edad di pensioen di 65, awo e cambio aki ta bin y mester vigila e consecuencianan cu lo tin.
Como sindicato, naturalmente, mas bo por ta contra cu ta baha edad di pensioen, pasobra esey ta duna e oportunidad na e miembresia of trahadonan, pa por bay den e vakantie largo ey, na un edad hopi mas tempran, e por gosa mas di su pensioen, etc.
Si nos kier papia solamente riba edad di pensioen y AOV, mester para keto un rato, ki consecuencia esaki por nifica pa e fondo y cuanto esaki lo ta, e porcentahe, cu hasta ta wordo menciona, cu tin un consecuencia di por lo menos cinco porciento riba e prima. E pregunta lo ta e ora eynan, kende ta bay paga e prima akinan. Ya nos sa caba cu e prima pa e trahadonan ta hopi halto. E cartera ya no ta wanta mas medida of golpi. Por lo tanto e prima aki, e discusion di ken lo bay paga e prima aki lo ta uno hopi mas interesante. Mescos e tema si edad di pensioen baha pa e empleadonan publico, e ora e pregunta ta, con ta para pa e fondo riba su mes. E ta asina cu e fondo di APFA awor aki na e momentonan aki ya ta den un periodo di recuperacion. Ainda e no ta completo.
SEPPA no a sconde su opinion riba e intencion di baha edad di pensioen.
Kico ta e posicion di banco Central riba esaki tambe ta bastante interesante segun MagalyBrito. Con e ta mira tipo di decisionnan aki cu su efecto riba dje naturalmente lo ta bay den miyones y kende tin cu carga e consecuencia di esaki, tanto pa esnan cu ta bay cu edad di pensioen mas tempran. Mester por sa cu ta contento pa nan, pero di un otro banda, e trahadonan activo, vooral e hobennan, ta esun cu tin cu carga cu e consecuencia aki. Naturalmente esaki tin efecto riba su dekkingsgraad, su grado di cobertura. Pa un fondo cu ta den un periodo di recuperacion, despues di tanto aña cu a cana e caminda aki. Sa cu e posicion di Banco Central semper tabata, cu en todo caso e fondo mester yega un grado di cobertura netto, sigur di 100% y un grado di cobertura bruto, e mester tin un buffer. Ta papiando aki di mas di 108% e ora eynan. Ta interesante pa por sigui e desaroyo aki pa por vigila e consecuencianan y tambe pa por tin informacionnan concreto, na tur hende pa nan sa cu bahamento di edad di pensioen ta zona bunita. Ta contento pa un grupo, pero di otro banda tin cu wak y ta cauteloso cu e consecuencianan cu tin pa esnan cu tin cu keda traha.
