Corte di Prome Instancia di Aruba a dicta un sentencia resaltante pa e sector di energia renovabel y e importadornan di material di panel solar. Den e caso hudicial aki Corte a evalua e disputa entre un compania y e Inspecteur der Invoerrechten en Accijnzen tocante e clasificacion di Duana y e tarifanan di invoerrechten cu mester wordo aplica riba diferente material importa pa instalacion di panel solar. E decision cu a wordo duna dia 7 di augustus 2026 y publica dia 14 di september 2026, ta aclaria detayadament e reglanan di clasificacion di Duana y e alcance di e politica di stimulacion pa energia berde na Aruba.
Entre e añanan 2020 y 2022, e persona cu tabata actua na nomber di e compania a haci diferente declaracion di importacion pa varios material destina pa instalacion di panel solar. E materialnan aki tabata encera kabelnan di coriente (powercables di e marca Helukabel), schroef, klem, etc. E importador a declara e mercancianan aki bou di e tarifanan di invoerrechten reduci di 2%, aplicando e codigonan 8541.4010 (panelnan solar), 8549.0001 (generador fotovoltaico) y 8541.9010 (piezanan di e panelnan).
Sinembargo, despues di un investigacion y control posterior, autoridadnan di Duana a conclui cu e materialnan aki no tabata cay bou di e tarifanan reduci di 2%, sino cu nan mester a wordo clasifica bou di postnan tarifa general cu un tarifa mas halto di 6%. Como resultado di e reclasificacion aki, e Inspecteur der Invoerrechten en Accijnzen a manda tres invitacion di pago (UTB) pa e compania na october 2023. E sumanan reclama den e UTBnan aki tabata Afl. 4.921,08 pa e prome documento (kenmerk 03.04.23/SS), Afl. 13.619,01 pa e di dos documento (kenmerk 03.02.23/SS) y Afl. 14.688,89 pa e di tres documento (kenmerk 03.00.23/SS), pa un total substancial di invoerrechten cu mester a wordo paga extra.
E argumento
E compania a entrega un obhecion na november 2023 contra e UTBnan ricibi. Como cu e Inspecteur no a tuma un decision den e tempo stipula pa ley, e compania a dicidi di bay corte na januari 2025 cu no a tuma un decision na tempo. Despues di esaki, na maart 2025, e Inspecteur a saca su decision oficial declarando e obhecion di e compania sin base. E proceso a continua den corte, caminda e audiencia verbal, a tuma luga dia 11 di december 2025.
E argumento principal di e compania tabata cu e golfplaatbouten, klemmen, moeren y schroeven ta parti esencial di e sistema di montahe produci door di e fabricanan di panel solar y cu e piesann aki no por wordo uza pa ningun otro proposito. Pa e motibo aki, e compania tabata sostene cu e materialnan aki mester wordo considera como parti integro di e panelnan solar y p’esey nan mester gosa di e tarifa faborabel di 2%. Pa loke ta trata e kabelnan marca Helukabel, e compania a splica cu nan ta conecta e inverter cu e punto di coriente di e sistema solar.
Di otro banda, e Inspecteur a defende e postura cu e reglanan di e Sistema Harmonisa (GS) ta exigi cu un producto mester contribui directamente na e funcion mecanico o electronico di e aparato pa e por wordo considera como un parti di dje. E Inspecteur a splica cu e sistema di montahe (bouten, schroeven, moeren y klemmen) ta sirbi unicamente pa fiha e panelen riba dak, pero nan no ta hunga ningun rol den e proceso di generacion di energia sostenibel. Pa e motibo aki, e materialnan di metal mester wordo clasifica den post 7318 (articulonan di hero y staal) y post 7610 (structuranan di aluminio) cu un tarifa di 6%. E bloki di kabel tambe mester cay bou di post 8544 como conductor general di coriente cu un tarifa di 6%.
Evaluacion di Corte
Den su sentencia, Corte a splica cu e uzo di e idioma comun o lenguahe general no ta determinante pa clasifica un mercancia pa Duana. E clasificacion mester wordo haci estricto a base di e reglanan di Geharmoniseerd Systeem (GS) y e hurisprudencia di Corte di Husticia di Union Europeo.
Relaciona cu e sistema di montahe (bout, schroef, moer y klem), Corte a coincidi cu e Inspecteur. Corte a remarca cu maske e piesanan aki ta necesario pa monta e panelnan riba un dak, nan no ta hunga ningun rol den e generacion di energia solar mes. E proceso di converti luz di solo den coriente electrico no ta depende di e presencia di e klemmen o schroefnan aki. Ademas, e reglanan di Duana ta stipula cu articulonan di uzo general (cu ta cay bou di post 7318 y 7610) no por wordo considera como parti di un aparato electronico den seccion XVI. P’esey, e clasificacion di e materialnan aki na 6% tabata legalmente corecto.
Sinembargo, e punto decisivo y faborabel pa e compania tabata relaciona cu e kabelnan electrico. Corte a analisa e contenido di e Begunstigend Beleid den e Decreto Ministerial di dia 9 di augustus 2011 (MB). E resolucion ministerial aki a wordo introduci pa stimula e uzo di energia renovabel na Aruba y ta establece cu parti electrico cu por wordo reconoci como exclusivamente destina pa sistemanan di energia solar o di biento, ta haya e mesun tarifa reduci di 2% cu ta conta pa e panelnan solar mes.
Corte a husga cu mescos cu e inverters (uza pa converti coriente) y e baterianan (uza pa warda e coriente), e kabelnan cu ta wordo uza exclusivamente pa transporta e coriente aki di e inverter pa e red di alimentacion ta cay bou di e concepto di partinan electrico destina pa e sistema di energia solar. P’esey, no tabatin ningun motibo pa exclui e kabelnan aki di e politica faborabel di e Ministeriele Beschikking. Consecuentemente, e kabelnan tin derecho di paga e tarifa reduci di 2% di invoerrechten.
A base di e analisis aki, Corte di Prome Instancia a declara e apelacion di e compania suficientemente hustifica y a destrui e decision di e Inspector riba e obhecion cu e compania a entrega cerca dje. Corte a dicta cu e UTB cu e number 03.00.23/SS (cu ta encera e importacion di e kabelnan) mester wordo reduci door di e Inspecteur, aplicando e tarifa reduci di 2% riba e kabelnan. E otro UTBnan cu tabata trata unicamente e materialnan di montahe a keda manteni na e tarifa di 6%.
Ademas, Corte a condena e Inspecteur pa paga e gastonan di proceso hudicial di e compania cu a wordo calcula na un suma di Afl. 700, y tambe pa entrega bek e suma di Afl. 300 cu e compania a paga na griffierecht. E sentencia aki ta establece un precedente hopi cla pa e importacion di componentenan pa proyectonan di energia solar na Aruba den futuro.
