Na APA tambe tin un dolor di cabes cu STA tin cu atende. Diego de Cuba, presidente di e sindicato a splica cu na APA a ripara cu tabata tin un referendum, caminda cu sindicato TOPA a solicita y STA a bisa cu nan no ta bay participa.
Nan kier a duna beneficio di duda na su miembronan na APA. A bisa cu e referendum aki lo lag’e full habri pa TOPA. Pero a bisa tambe cu si TOPA no logra e mayoria, nan hala kita pa laga STA traha.
Kico ta pasa
TOPA a perde. Nan no a haya e mayoria. Pero awo a bin ripara cu TOPA a bolbe bin mete la pata. Segun de Cuba, ta un persona den nautische dienst cu ta echando e baina aki y cu ta kibrando e union cu tin den e compania APA. Esaki ta di lamenta, segun de Cuba.
Loke cu mas STA ta lamenta cu tin cierto hendenan cu ta bay su tras, sin cu nan ta mira cu e persona aki ta uzando full e grupo pa su beneficio personal.
STA ta bringa un causa colectivo. Un causa comun.
No ta bringa pa cada trahado individual. Claro, cu lo sali na defensa si un trahado individual hay’e den problema. Pero no por ta asina cu ta bay keda bringa pa beneficio di un trahado individual. Si ta sinti cu un trahado tin derecho riba cierto cosnan y tin cu bay corte mes p’e, ta bay corte p’e. Pero den e caso aki a ripara cu un referendum a wordo solicita via oficina di Mediador di gobierno.
STA a kere cu mediador di gobierno lo nenga e referendum aki. Semper cu tabata tin referendum na APA tabata pa full e compania, door cu nan no tin hopi trahado.
Kico ta pasa
Den e situacion aki bo ta haya cu TOPA a sapatia. Awor aki e kier un referendum pa e departamento aki separadamente. Bo kier kibra e union laboral cu tin den e compania APA. Bo kier kibra e CAO. Bo kier forsa un referendum. De Cuba ta spera cu e trahadonan di APA revisa e lista di esnan cu ta bay vota y nan ta ripara cu e persona cu a cende e candela aki, ni e ta aparece riba e lista di voto.
E no por ni vota den un referendum. Pero kier uza tur esnan cu kier vota, pa abo logra bo meta. Esaki de Cuba ta haya masha inhusto mes. E persona aki ta completamente fout bezig. E mester compronde cu ora ta trata di un compania manera APA, ta un compania serio, ta un compania cu tin hopi aña caba di existencia y pa hopi aña a trata cu e compania aki y awo kier parti’e for di otro. Esey no ta prudente.
