Awe ta recorda e momento historico caminda na aña 2000 cuater organisacion scout separa a bini hunto, a delibera pa varios aña pa logra yega na diferente consensus pa unifica tur e gruponan aki bou di un organisacion nobo, pa funda Scouting Aruba oficialmente. Actualmente e organisacion ta consisti di 12 grupo rond di Aruba cu un cantidad di mas di 500 miembro. Tanto mucha como hoben entre 5 pa 18 aña y lidernan adulto ta forma parti di e organisacion.
E actividadnan scout of padvinderij ta bon conoci na Aruba ya pa 90 aña. Antes cu lasonan directo cu Antias of directamente afilia na organisacionnan religioso, awendia tur scout localmente ta miembro di un organisacion nacional cual ta conta cu afiliacion na e organisacion mundial di Scouting yama “WOSM” cu tin miembro na tur pais na mundo; en total mas di 50 miyon miembro.
Scouting manera ta conoci ta e organisacion hubenil mas grandi na Aruba cu por medio di su metodo di educacion, no formal, basa riba nos ley y promesa scout, ta educa mucha y hobennan pa bira cuidadano util y responsabel pa nos comunidad y cu capacidad pa ta nos lidernan di mayan den nan respectivo comunidad, trabou y bida.
Scouting ta logra esaki por medio di su programa interactivo caminda e hoben ta wordo presenta diferente desafio pa pasa door di dje y den e proceso e ta siña conoce su mes miho, e ta siña desaroya su habilidadnan y conocemento y ta wordo forma como persona por medio di diferente areanan di crecemento como ser humano tanto fisico, caracter, creativo, afectivo, social y spiritual.
Pa motibo di e conocido crisis mundial cu grandemente a afecta Aruba tambe, a impedi e celebracion di 20 aniversario y dia di San Jorge (Sint Joris), patrono di tur scout, manera tabatin planea pa haci cu e miembresia completo. E educacion scout ta forma bo di tal manera cu bo mester por haci uzo hasta di adversidad pa busca oportunidadnan y solucionnan nobo pa e organisacion cu miras hasta pa mehoracion den futuro cercano. Awor ta e momento pa presenta ideanan nobo pa por re-ahusta y prepara miho ainda. Asina cu e situacion actual bolbe reestablece y na e manera apropia, lo celebra 20 aniversario cu cada Bever, Welp, Verkenner, Explorer, Voortrekker y Lider miembro di Scouting Aruba.
Finalmente, na nomber di liderazgo nacional, ta gradici tur miembro y mayor kendenan ta pone nan confiansa den scouting, tur e lidernan boluntario, cu ta e pilarnan pa brinda formacion educativo y na tur comisario pa nan aporte pa dirigi e organisacion aki cu awe por celebra e di 4 lustro di Scouting Aruba cu e patrono y fundado fuertemente den mente. Masha Masha Pabien na tur scout sea activo of cu a forma parti di e organisacion den pasado.
Pa termina, un ultimo palabra na tur Scout: Keda activo cu bo grupo di amigonan y lidernan. Sostene otro y apoya otro den e momentonan distinto aki pa por surpasa e crisis y sali mas fuerte padilanti cu nunca. Pasa un feliz dia di San Jorge celebrando nos di 20 aniversario. Sea orguyoso di ta scout!
