Esunnan cu ta volg politica por corda claramente con esunnan den e gobernacion actual tabata grita masha. Nan a uza situacion di e scolnan Reina Beatrix y Juliana pa asina hunga cu e preocupacion di e mayornan. A cuminsa un sin fin di storia di e opocision e tempo ey, cual netamente e ministernan actual a ataca e gobernacion di e tempo ey.
Tur e esaki a sosode y awe cu cinco aña gobernando loke tin ta un deterioro di ambos scol. E tempo ey MEP a logra grita y gaña para cu e mayornan. A logra pa saca e muchanan y manda nan na diferente localidad cu awe gobierno ta pagando. A pasa algun aña di e gobernacion di AVP y cinco aña di e gobernacion di MEP. Te awe no ta tende nan papia mes di e scol Beatrix cu Juliana.
Mientras cu MEP awe a bira lomba pa enseñansa, e bario di Klip si ta na grito pa yudansa. E siguridad den nan bario a bay atras. Dos scol den bon condicion pa ser drecha awe a bira cas di choller y paloma. Den e klasnan e chollernan a haci desaster. A horta diferente ekipo di airco pa bende como koper. Bisiñanan mes a laga welder portanan di hero pa choller no pasa. Candalnan tabata ser kibra. Hasta a cera e klasnan cu plywood.
Algun experto di gobierno a core yega riba un dia y nan a laga kita tur e plywoodnan. A bay haci un recorido y evaluacion di e edificio cu ta un monumento. A papia di bende ambos scol. Den e proceso no a pega e plywoodnan bek. Chollernan a bende of bay cu mayoria di e plywoodnan. No ta solamente e dos scolnan ta den gara di choller yen di sushi y mas destrui cu nunca.
E sala cu ta keda na e otro banda di caminda tambe ta den mesun situacion. A cera e sala pero asina mes ladronnan a bay cu e piesanan di airco pa bende como koper. Asina e habitantenan mester biba cu e cantidad di chollernan rond di e casnan cu ta cay den George Madurostraat, Beatrixstraat, Julianastraat y Irenestraat.
Tin mas habitante den otro cayanan di Klip cu tambe mester a haci extra trabou pa garantisa nan seguridad na nan propiedad. Habitantenan ta spera cu pronto gobierno haci algo. Tur e placa cu nan ta pagando na huur pa otro localidad, por cuminsa inverti sikiera den un di e scolnan aki pa asina e muchanan por haya les den un local adecua.
