Siman pasa mi a skirbi cu mi nieta Sarah Hickman – Harms a wordo contrata pa referee tres wega di Canadian Women’s Hockey League (CWHL) na Shenzhin, China. Awe mi ta comparti cu boso algun di su experiencianan mas memorabel di su biahe.
Sin duda, e vuelo di 16 ora non-stop fo’i Dallas te Hongkong tabata un experiencia cu Sarah lo recorda semper. Despues di su yegada otro aventura memorabel tabata sper’e: E crusamento riba e brug nobis nobis cu ta conecta Hongkong cu China. E brug aki ta wordo considera un milagro tecnologico. A tuma nuebe aña pa construye na un costo di 20 biyon dollar. China tin brug mas largo, pero e brug aki ta esun di mas largo (55km) di mundo cu ta crusa lama.
Cu un ceremonia masha bunita y impresionante e tres weganan a wordo inaugura. Scuchando e himno nacional di Canada y China, Sarah a sinti un emocion profundo cu a pone reflexiona. E tabata puntra su mes si esaki ta un bendishon di Dios of ta su recompensa pa tur e añanan cu el a dedica na e deporte ice hockey, como hungador cuminsando na edad di apenas cinco aña, como miembro di e ekipo di Sacred Heart College durante cuatro aña, y como referee despues cu el a stop di hunga. Sarah a sinti un gratitud enorme pa su mayornan cu semper a apoy’e.
Cu e diferencia minimo di un gol Canada a gana tur tres wega, pero e Red Stars di Shenzhin ningun momento a stop di lucha. E scorenan 2-1, 4-3, 4-3 ta refleha e tenacidad di e ekipo anfitrion. E di dos wega te hasta a bay den overtime prome cu e Canadiensenan por a seya nan victoria. Como cu e weganan tabata preta, e refereenan mester a move continuamente di un punta di e cancha pa e otro y mantene nan wowonan pela cu hopi atencion riba e accionnan rapido riba ijs. Sarah a calcula cu el a schaats mes tanto cu tur e hungadornan.
Riba nan dia liber Sarah y su coleganan tabatin e placer di tin un guia/traductor di e Liga cu a compaña nan pa bishita algun punto di interes, lugarnan historico, mercadonan habri y restaurantnan caminda nan por a mira y come cuminda Chinees di berdad.
Despues di e vuelo di 16 ora non-stop di Hongkong pa Dallas y conecta cu un vuelo pa Springfield, CT, Sarah a yega su cas na Holyoke, MA dialuna mainta; sano y salvo, contento y satisfecho despues di su biahe, pero mes ora e mester a bay scol caminda e ta maestro di deporte. Mi por imagina mi cu den e proximo dianan su alumnonan lo scucha hopi storia di Sarah su biahe inolvidabel pa China.
