Aruba ta riba e ruta pa un dictadura bou maneho di Gabinete Wever-Croes. Bou hopi engaño a campaña cu si kier FASE vota MEP, unda cu no a splica pueblo di ki forma gobierno lo a yega e suma pa por cumpli cu esaki. Alabes pa cuanto tempo Aruba como un isla lo por sostene esaki financieramente. Pasobra nan tawata sa e momento ey, cu si nan lo a sinta bek tabata sa precies den ki estado nos finanza tawata.
Asina aki treciendo un programa di campaña sin tin un structura financiero. Nan a drenta den gobierno y pa por a cumpli a cuminsa gaña aki y aya sin midi e consecuencianan pa cu futuro di Aruba.
Sin perde pa gana a sigi opta cu mas mentira.
No MAS medida, e ser humano ta central, nos grandinan merece mas atencion y lo cambia e ley di abuso di mucha den 6 minuut entre otro. Awe pueblo mester biba cu e tristo y humiyante berdad cu MEP a gaña un biaha mas e pueblo Arubano. MEP ta pretende cu e pueblo Arubano ta ignorante. Awe pueblo por wak cu Gabinete Wever-Croes a haci net contrario na loke nan a campaña cu ne.
Gabinete Wever-Croes bou di engaño y na un manera cobarde a core bay Hulanda yora pa placa. No a consulta cu gremionan riba con ta e miho manera pa procede sino a bisa Hulanda cu nan lo baha salario di tur ambtenaar y gelijkgestelden. Nan lo haci e recorte den AZV di 60 million pa aña. Asina Gabinete Wever-Croes a bin Aruba.
Manera ta costumber di e gobierno aki a opta un biaha mas pa ATROBE gaña pueblo y tur trahadonan cu e recorte ta pa FASE y Loonsubsidie y e recorte den AZV tur ta condicionnan cu Hulanda a impone a cambio pe likides financiero. Den e forma aki nan a purba manipula tur gremio na Aruba y nos hendenan, cu ta Hulanda ta e culpapel di tur malo cu nan como gobierno ta haci.
Despues di a forma gobierno a kita e FASE. Gabinete Wever-Croes a kita e FASE abruptamente sin pensa con algun hende lo bay come y biba. Nan NO a bin cu un solucion, NO a crea cupo di trabou ( TIO ). (Tio a muri silenciosamente).
Gabinete Wever-Croes ta marginando e pueblo. Ora sindicatonan a sali pidi nan 12.6% ATROBE otro gañamento di Gabinete Wever-Croes, cu ta Hulanda a exigi e recorte di 12.6%. Na un manera dictatorial Gabinete Wever-Croes a keda para riba su mentiranan y NO ta worry cu e trahadonan. Polis, douane, maestronan di scol etc no tin nada di bisa. Nan derechonan ta wordo trapa door di e gobierno y su parlamentarionan.
Awe pueblo por wak cu e ser humano NO ta central, sino un grupito so!. Awe nos grandinan NO merece mihor cuido medico paso nan ta riba 70 aña caba. Nan a contribui si pa hopi aña na belasting y AZV pero tin un regla “code rood NO reanimatie”. Tristo pero berdad. Anto asina nan a bisa nos grandinan merece mas atencion. Awe pueblo tin cu bay biba cu e pago di eigenbijdrage pa remedi, consulta di dokter, specialista etc. Pero no a baha si e premie di AZV cu mester paga ainda despues di ta pensionado.
Gabinete Wever-Croes ta bay introduci un BTW di entre 16% pa casi 19% mientras e pueblo NO tin un entrada drechi of stabiel. Sin cuer’i cara!
Gabinete Wever-Croes NIUN dia so desde e pandemia a sinta cu asociacion di banco pa asina wak con pa introduci un rebaho di % di interes. Creando asina posibildad cu mas hende lo por fia placa of mantene nan hypotheek of loan, caminda nos economia por draai mihor. Fair share pa banconan y e pueblo.
Prijs di gasoline ta keda subi, paso Gabinete Wever-Croes a dicidi riba su mes y pa capricho NO ta bai hedge e fuel oil mas. Pa capricho y iresponsabilidad di gobierno nos pueblo a gana un aumento di prijs di awa y coriente. Gabinete Wever-Croes ta malgasta placa di pueblo den cosn cu no ta e momento en bes di subsidia esunnan den mal situacion sin awa of coriente na cas. Nan prioridad ta completamente robes!
Door cu gobierno NO a hedge e fuel oil, alabes consecuencia di e guera na Ucrania ta haci cu gobierno NO por salvaguardia su pueblo un mihor tarifa pa awa , coriente y gasoline.
Gabinete Wever-Croes ta practica censura di prensa y ciudadano. Asina prensa bisa algo berdad di nan mal maneho, prensa aki nan ta ricibi carta di menasa di DTZ. Claramente pueblo por a wak con e Minister di husticia ta censura periodista di 24ora na momento e no a gusta e preguntanan haci na su persona. Un postura dictatorial! Asina un ciudadano den caso di un ambtenaar habri su boca bisa un berdad di e mal maneho di gobierno, mesora ta core kit’e di trabou of menas’e di un manera of otro. Apesar un ambtenaar mester mantene su mes na e LMA, desde e cambio den grondrecht na aña 1983 caminda cu e libertad di expresion a bira onverkort pa ambtenaar. Aki tambe nos por wak un biaha mas con un ambtenaar den KPA ta wordo geschorst paso e lo a expresa algo riba social media. Un postura dictatorial di e mesun minister di husticia. Nan ta busca tur forma di persigui tur esunnan cu no ta di nan mes un pensamento.
Ambos Gabinete Wever-Croes 1 & 2, forma pa un coalicion, durante debate a vocifera cu nan ta para p’e pueblo. Awe nan tur a lubida nan promesa durante campaña. Ningun di nan awe ta para banda di e pueblo cu a duna nan e oportunidad pa goberna. Wel nan ta den den e mesun boto di engaño.
Parlamentarionan di oposicion y pueblo a exigi transparencia den e contract di Eagle LNG. Gabinete Wever-Croes na un manera dictatorial a burla di e pueblo evadiendo di trece e contract ter inzage durante e openbare vergadering. Keto bay ta evadiendo e tema aki.
Aruba kier y merece sa ki tur ta para den e contract ey cu lo por tin consecuencianan sumamente serio pa Aruba. Ainda gobierno ta kere pueblo ta bobo? Pueblo boso pone man na boso curason pa locual ta bin pa nos pais Aruba, nos NO sa na kico Gabinete Wever-Croes a mara nos yiunan, nietonan y bisanietonan na dje cu e contract di Eagle LNG.
Gabinete Wever-Croes a fia desde pandemia likides di Hulanda y pueblo ta exigi pa sa unda y con e placa nan aki a wordo gasta. Gobierno aki tin e palabra” integridat” como nan palabra preferi pero te awe no ta practica esaki. Awe Gabinete Wever-Croes NO TIN AUTORIDAD MORAL di papia di mega debe si nan a crea un GEGA-debe anto sin 1 solo inversion pa pais Aruba y su pueblo.
Cada punto aki riba ta muestra di unda nos pais Aruba ta bayendo, un maneho di DICTADURA!!. Nos di Pueblo Preocupa lo keda haci apelacion na cada un di boso aki na Aruba, pa bira mas critico y analisa mas kico nos gobernantenan (Gabinete Wever-Croes) ta haciendo y ki rumbo nan ta hibando bo futuro y di boso yiunan. Un biaha mas wak rond cuanto famia nan a bay laga Aruba y cuanto ta evaluando e posibilidad pa bay, pasobra hopi ta premira un Aruba dictatorial. Aruba su futuro ta depende di nos tur!
