Partido MEP a adopta un rol di victima despues cu mi a manda pregunta na Evelyn Wever-Croes. Den su comunicado di dia 5 di november ultimo MEP ta nenga di hiba un politica madura y reconoce e hecho cu prome minister Wever-Croes a pone integridad di Censo na peliger ora cu Wever-Croes a scoge pa pone un conseho pa garantisa integridad un banda.
Hefe di Censo, Sharin Luydens, a conseha pa no duna un BVVD (un verlof excepcional) na un empleado pa motibo cu mester di un cantidad minimo di empleado pa garantisa integridad di Censo. Esaki Luydens a raporta. Dicon MEP ta bisa awor cu e persona a baha cu VUT en bes cu ta trata di un BVVD? Ta ken ta gaña: MEP of Diensthoofd di Censo? Ken tin un falta di integridad? Sharin Luydens a mal informa prome minister of MEP ta bezig di mal informa Pueblo?
Un manager cu ta tuma integridad na serio ta tuma cierto medida pa fraude ni hortamento (verduistering) por tuma luga. E medidanan aki ta encera autorisacion pa haci cierto transaccion, documento y registro adecua, control independiente riba performance di e empleadonan y separacion di funcion. Un ehempel di e separacion di funcion ta ora cu ta laga un empleado ricibi pago den forma di placa efectivo, ta laga un otro empleado registra e recibonan di e placa cu a drenta y un otro empleado ta deposita e placa na banco. Si un manager no ta haci su trabao manera mester ta y ta laga un solo persona traha cu placa, registra placa y deposita placa na banco, e mes ta pidi pa problema. Esey simplemente ta mal maneho. Den e caso di Censo prome minister tabata sa cu si e duna e BVVD e lo ta creando un riesgo di integridad. E mal maneho a costa mas cu 60.000 florin sin conta e gastonan di proceso hudicial, e rapport di CAD y otro gastonan innecesario, si e maneho ta integro.
Loading…
Reload document 
Open in new tab P’esey ta un falta di seriedad completo di parti di MEP pa purba bolter e storia y tira tur culpa riba e empleado cu a comete fraude. E empleado ta responsabel pa su actonan, pero e no ta responsabel pa mal maneho di control di integridad. E pregunta ta keda cuanto miyones e mal maneho ta costa Aruba? Nos sa cu tabata tin fraude di 800.000 florin na Departamento di Impuesto. Nos sa cu nombracion politico y otro violacion di integridad ta na ordo di dia den hopi di nos entidadnan publico y semi-publico y pa colmo MEP ta apoya un conflicto di interes di mas cu 3 miyon florin cu minister Endy Croes tin como Minister di Deporte. Aparentemente MEP no kier madura, ni hiba un maneho responsabel. MEP ta pretende cu prome minister Evelyn Wever-Croes a haci su trabao pasobra el a tuma accion despues cu e baca a hoga caba. Locual MEP kier tapa ta cu e sa cu medidanan disciplinario manera schorsing di e empleado y kita e empleado for di trabou ta medidanan represivo cu mester t’ey como ultimo remedi. MEP sa cu goberna na un forma responsabel y madura ta rekeri medidanan preventivo y vision. Sinembargo MEP ta opta pa no ta transparente y pa bin cu atake personal. E pregunta ta kico ta haci MEP asina tanto dolor cu e mester bin cu atake personal? Unda e integridad y profesionalismo di MEP a keda?
