E reunion di BBO na Frontera a cuminsa yen di controversia. A cuminsa laat y despues e miembro di fraccion di Raiz, Misha Raymond, cu ta sostene coalicion, a tira un menasa direct riba Gobierno. E tabata manera e frase ta bisa cani mi pa mi cani bo. Rycond Sasntos do Nascimento, miemro independiente den Parlamento a bisa cu tur hende por a mira con corupcion a tuma luga den sala di Parlamento.
El a sinti cu Raymond den su presentacion a simplemente chantagea Gobierno, bisa di un forma directo. El a sinti cu e actitud di e parlamentario di Raiz ta cu no pasobra e no a analisa e ley di BBO na frontera of cu e no ta di acuerdo di cu ne, pero simplemente pa e vota na fabor di e ley Gobierno mester dun’e algo cu e kier.”Esey ta corupcion cu a tuma luga dilanti di tur hende, dilanti camara,” Santos do Nascimento a bisa.
E ta sinti su mes frustra pasobra e hendenan no ta realisa cu no por goberna e pais di e forma aki. Esaki ta e realidad. A mira actuacion di varios integrante di e partido Raiz. Cada cambio cu ta bini cu ne pa e reforma fiscal, ta trece insiguridad den e pais. E ta trece cu ne cu hendenan no kier inverti y ta afecta e economia. E insiguridad pa cu ley di BBO, e comerciantenan ta bay hisa e prijsnan mas de lo necesario. Y tristo ta cu Gobierno mes a fomenta esaki. Ora tin insiguridad ta crea inflacion, cu ta e problema dim as grandi awo.
Aruba mester di un Gobierno cu ta trata e situacion di un forma serio, pasobra no por sconde di e realidad ni tapa solo cu un solo dede. Tin hopi debe pa paga, hopi reforma pa haci y otro cambionan grandi. Pero no por keda hunga cu e reformanan pasobra esaki ta crea insiguridad cu lo tin efecto riba economia y e hendenan.
