Varios miembro di Parlamento a yega diaranson mainta pa participa den un reunion publico riba BBO na Frontera sin cu tin un panorama mucho cla di loke ta deducibel den e concepto di ley aki cu mester haya aprobacion di Parlamento.
Aquanette Gunn, di e fraccion di MAS den Parlamento, a expresa cu e ta un di esnan, mescos cu gremio commercial, ta haya cu e ley di BBO na Frontera no ta brinda mucho claridad. El a menciona e intercambio di corespondencia di gremio cu e minister concerni riba e punto di preocupacion aki. Ta parce cu e Minister lo a informa gremionan cu e lo tene cuenta cu nan preocupacionnan.
Debi na e preocupacion existente, a haci pregunta na e mandatario pa no solamente e elabora riba e ley pero tambe specifica e problema cu henter comunidad ta bay sinti e efectonan ora cu e ley pasa Parlamento.
Gunn a bisa cu e no por keda sin menciona cu implementacion di BBO na Frontera lo trece inflacion, of lo aumenta esaki. Pero tambe lo haya cu esnan mas vulnerbel cu ta pasa den un situacion dificil ta bay crea mas problema pa nan. “Esaki no ta digno. Cada ciudadano tin derecho riba un bida digno,” e Parlamentario a bisa.
Mas leu e ta kere cu introduccion di BBO na frontera ta solamente pa Gobierno cumpli cu e obligacion cu tin cu Hulanda, sin tene cuenta cu e ser humano, cu ta central. Si ta cana den pueblo lo nota cu e ciudadanonan no por mas cu tur e medida y no tin bida digno.
