Diaranson mainta a marca otro paso den aumenta e capacidad riba e ruta di Colombia. E biaha’ki tabata Wingo cu a inaugural su ruta Cali – Aruba, unda tabata presente Minister di Turismo Dangui Oduber. E mandatario a mustra di ta hopi gradici cu Wingo, inaugurando su di tres vuelo for di Colombia pa Aruba.
E vuelo directo for di Cali ta bay crea oportunidadnan nobo pa Aruba.
Prome ruta tabata Bogota Aruba cu a sigui pa esun di Medellin y awo Cali. Esaki ta confirma e confiansa cu Wingo tin den e destinacion Aruba, E ta fit perfectamente den e strategia pa diversifica e Mercado laboral di Aruba. Ta logrando esaki cu exito y por a scucha e siman aki tambe cu Avianca a expande su capacidad riba e ruta pa Aruba.
Na e momentonan aki Wingo tin 10 vuelo semanal pa nos isla, cu ta e aerolinea cu mas turista ta trece Aruba despues di Avianca y Copa. “El a resulta un partner exitoso pa Aruba si analisa e cantidad di asientonan cu nan tin disponibel.” Desde e prome vuelo inaugural, a considera Aruba como un producto di calidad, ta loke nan a informa na e mandatario di Aruba.
Minister Oduber ta contento tambe pa motibo cu Wingo ta ofrece prijsnan sumamente competetivo cu ta atractivo pa Arubianonan cu kier biaha pa Colombia.
Den un bon escenario, ta spera di haya entre 47 pa 50 mil turista for di Colombia pa 2023.
Otro ehecutivo contento pa e hecho cu Aruba a haya un otro vuelo ta Ronella Croes, CEO di ATA. Croes ta contento cu e storia di exito entre Wingo y Aruba. A keda mira un aumento den e cantidad di asientonan cu a pone disponibel. E aerolinea aki a crece hopi lihe si mira cu nan tin 10 vuelo semanal compara cu e 11-nan di Avianca. Mas cu tur cos, Wingo ta permiti Aruba pa diversifica e mercado den Colombia mes. No mester lubida cu Colombia ta hopi gusta cerca Arubiano.
E vuelonan extra aki ta yuda Aruba sigui crece for di Latino America. A recupera casi 90% compara cu 2019 y den 2023 ta pensa cu lo surpasa e cifra di 2019. Te cu mei Colombia a crece cu 24%. E ta duna mas posibilidad pa esnan cu kier bishita Aruba. Pero lo sigui traha pa sigui expande hopi mas.
Cali ta un di e mercadonan importante pa Aruba, historicamente. Ta door di e confiansa den e producto Aruba cu a bin ta aumenta e vuelonan. Aruba ta e unico destinacion internacional di Wingo cu na e momentonan aki nan ta expandiend. “E ta bisa hopi di e storia di exito entre Wingo y Aruba.”
Pa aeropuerto tambe e tabata un dia grandi aumentando e servicio di un di su clientenan. Jo-Anne Arends, Air Service Development Manager di Triple A, a conta cu e prome vuelo di Wingo for di Bogota tabata na 2016. Aña pasa, despues di Covid, a expande cu e ruta di Medellin. Na inicio, despues cu tabata existi un solo aerolinea, el a crea poco cautela cerca tur hende. Pero awe shete aña despues Wingo a demostra cu el a trece cambio y a resulta exitoso te cu a yega awo na 10 vuelo cu tres conexion na Colombia, cu un tarifa atractivo pa principalmente e localnan,
Arends a conta tambe cu na e momentonan aki pa Latino America Aruba tin 30 vuelo pa siman, y 20 ta di Wingo.Esey ta demostra con fuerte e mercado aki ta. Esaki tabata ruta no. 31 pa aeropuerto. A scucha for di Wingo cu ya caba nan tin un loadfactor di 80% pa cual no mester descarta cu por añadi mas vuelo.
