Dialuna atardi te cu den ora di anochi, e parlamentarionan a trata e tema di Landsverordening Aruba tijdelijk financieel toezicht (LAft), unda a conta cu presencia di e ministernan Evelyn Wever-Croes y Xiomara Maduro. E parlamentario independiente ta di pensamento cu si e financia di Aruba ta na ordo, e ora por brinda un miho servicio. mr. dr. Ryçond Santos do Nascimento, parlamentario independiente, ta kere cu e pais mester di e supervision financiero y historia ta demostra cu Aruba no a cumpli cu e ciclo presupuestario.
Hopi biaha den historia por mira cu e presion for di esupervision financiero ta yuda. Tambe e presion di landspakket ta yuda. Esey ta pone cu gobierno ta bay den un direccion nobo. E ta kere cu esey ta loke mester pa “nos yiu- y nietonan por tin un futuro den e pais aki.” Pa loke tabata e debate, el a expresa cu esey a bay bon.
E politica na Aruba ta polarisa. E nivel tin biaha ta laga di desea. Esey ta e realidad y mester biba cu ne. E parlamentario independiente ta spera cu e ciudadano cuminsa exigi un gobernacion di calidad compara cu locual ta hibando n’e momentonan aki. Segun Santos do Nascimento, loke ta mira desde 2015 pa awo ta cu e reglanan a cuminsa bira mas skerpi p’e administracion financiero di e pais, locual ta otro norma. Esey ta significa cu ta exigiendo mas di gobierno riba e parti di financiero. Esey ta saludabel y sano. Esaki ta debi cu si e financia publico di e pais ta na ordo, e ora gobierno por duna un servicio hopi mas miho. Pa mas lesa TREMPAN.COM.
