Departamento di Asunto Social (DAS) a organisa un workshop titula “Mi Relacion Cu Placa” na Centro di Bario Playa Pabao. Marceylaine Paskel di DAS a expresa cu e evento tabata un exito rotundo, contando cu un registracion halto y un gran asistencia di personanan di comunidad.
E iniciativa aki no solamente a enfoca riba crecemento personal, pero tambe riba e sosten di diferente organisacion manera NV Elmar, Fundacion Bandera di Nos Comunidad, FCCA, y e sede di WOW Mobil.
Cooperacion cu stakeholder y organisacionnan
E workshop a conta cu presencia y participacion di varios stakeholder importante.
Kristel Perez di FCCA a comparti informacion tocante hipoteca, huur, y con e departamento social ta yuda cliente den bario cu problema financiero, unda nan ta wordo referi na Direccion Social Zaken pa ayudo budgetario. Audrey Croes di NV. Elmar a destaca e iniciativa di e campaña “Cas Corriente y Consciente” cu e lema “Hunto Nos ta Spaar”, compartiendo informacion riba con pa spaar coriente a base di consumo y haci cas mas eficiente pa uza menos coriente. Gabriel Marchena di Fundacion pa nos Comunidad a comparti informacion tocante e workshop pa guia cliente y persona den comunidad pa haci compras responsabel di producto den supermercado, uzando un lista pa asina evita gastonan innecesario y garantisa cuminda suficiente na cas.
Proximo workshop
Pa esnan cu no por a atende e ocasion aki, DAS a anuncia un proximo workshop di 3 dia cu ta completamente gratis na Centro di Bario Lago Heights, cuminsando dia 4 di november. E invitacion ta habri pa pueblo di San Nicolas y henter Aruba, y registracion ta habri for di awo caba.
