Un otro temporada di klapchi ta tras di lomba y contrario na otro añanan, e biaha’ki no a resta ningun material. Tur loke cu tabatin riba Wela di 2019 y loke a importa den 2020 a “sold out”.
Pa Departamento di Obranan Publico (DOW), e tabata un temporada cu a bay hopi bon. Segun experto den explosivo di e departamento aki, Rubin Ponson, nan ta satisfecho te awor aki con tur cos a bay. Pa loke ta bendemento, ta algo cu nan a premira. Den diferente relato duna anteriormente a menciona esaki caba, cu a sospecha cu ya e prome dos dianan pagara lo a caba y esey ta loke exactamente a sosode.
Mayoria di e luganan a bay bende tur loke ta pagara. Manera cu tambe a bisa, no por papia di scarsedad di klapchi, debi cu no tabata sa con e compra lo a bay ta. Por a wak cu en berdad te na ultimo dia tabata tin klapchi na benta. E anochi di dia 31 por a mira basta fila na e diferente puntonan di benta.
Tin luga, nan ta calcula mas of menos mita di e puntonan di benta, a cera den oranan di atardi y e otronan, den oranan di anochi a caba di bende nan klapchi.
Te asina leu, segun Ponson, no tin klapchi mas. Hopi biaha e puntonan di benta ta keda cu algun klapchi cu nan ta tira pa nan mes. Pero te con leu cu sa no tin ningun klapchi mas. Ni di loke a resta di e aña anterior y esunnan nobo cu a bin.
Control di puntonan di benta
Ponson ta agrega cu e aña aki, tabata un aña diferente. Locual cu ta e parti di e reglanan di DVG. Esey a haci e controlnan un tiki mas diferente. E luganan cu mester a cera temporal pa drecha, ta pa mantene distancia, etc. No tabatin luganan cu nan a cera definitivamente y tampoco tabatin klapchi confisca.
Unicamente algun luga a cera pa algun rato, pa haci algun adaptacion na e punto di benta y despues por a habri bek.
Con ta premira 2021
Rubin Ponson a splica cu e importacion tabata na tempo. Tur cos a bay na tempo e biaha aki. Aunke cu mester bisa cu e cantidad tabata hopi menos, cual tabata mas facil pa por a maneha.
Di otro banda, pa e comerciantenan lo ta interesante pa wak con nan lo bay haci’e e aña aki, mirando e cantidad cu a bende, cual ta un cantidad hopi menos cu aña pasa. Nan hunto lo mester cera cabes y calcula cuanto nan lo mester por importa pa por sali for di esaki na final.
Tur aña ta diferente pa loke ta importacion. Tin hende ta bisa cu net e aña cu a pasa ta e aña cu nan kier nan klapchi pa nan core cu e fucu, manera ta tradicion. No lo sa kico lo pasa e aña aki. E cantidad cu a pone riba mercado e ultimo aña lo mester pensa den e direccion ey. Si e por ta un tiki mas of un tiki menos, pero eybanda e lo mester keda.
Siguiente proces
Awor aki e comerciantenan tin dos siman pa kita e containernan for di caminda nan a pone nan y warda nan. Normalmente dia di entrega klapchi tambe lo tabata den e prome siman di januari, pero e biaha aki no lo bay tin esey. E unico cos cu ta keda ta pa kita e containernan cu ta poni riba caminda pa bende klapchi.
Ultimo palabra
Esaki ta un muestra cu si tur por cumpli cu regla y tur scucha y haci loke mester haci, tur lo beneficia di esaki. Tin diferente grupo den comunidad cu kier tira nan klapchi. Otronan cu no kier. Pero si tin e cantidad suficiente cu esnan cu kier tira haci bon uzo di esaki, mantene nan mes na regla, tur lo pasa un aña contento. Esey ta loke a sosode e biaha aki tambe, Ponson a bisa por ultimo.
